Na treci dzień paśla rasiejskich vybaraŭ u Dumu naradziłasia ci nie hałoŭnaja sensacyja našaha času: u Miensk jedzie prezydent Pucin. Jak paviedamlaje dziaržaŭnaje infarmacyjnaje ahienctva BiełTA, 13‑14 śniežnia adbudziecca pasiadžeńnie «Vyšejšaha dziaržsavietu sajuznaj dziaržavy Rasiei i Biełarusi», padčas jakoha Łukašenka i Pucin «majuć namier detalna abmierkavać perspektyvy pryniaćcia Kanstytucyjnaha aktu Sajuznaj dziaržavy».

Nie paśpieła hetaja navina ablacieć biełaruski internet, jak na mnohich sajtach źjavilisia ekspres‑vodhuki palityčnych kamentataraŭ. Amal usie bjuć tryvohu: niezaležnaść Biełarusi pad pahrozaj! U paćvierdžańnie hetaj tezy adzin z aŭtaraŭ pryvodzić toj fakt, što vizyt Pucina budzie doŭžycca ažno dva dni — za hety čas, maŭlaŭ, možna naprymać šmat losavyznačalnych rašeńniaŭ.

Pišuć, što dla Pucina ŭznačalić Vyšejšy dziaržsaviet (jaki ciapier, nahadajem, uznačalvaje Łukašenka) — sposab zachavać usiu paŭnatu ŭłady ŭ Rasiei paśla abrańnia ŭ sakaviku novaha prezydenta RF. Darečy, užo 17 śniežnia moža być nazvanaje imia «pierajemnika».

Nu, a Łukašenku za łajalnaść Pucinu buduć ilhoty na rasiejski haz dy inšyja ekanamičnyja preferencyi…

Cikava, što rasiejskija ŚMI, najpierš — internet, značna bolš spakojna adreahavali na navinu. A dakładniej skazać — nijak nie adreahavali. Nia kažučy ŭžo pra administracyju prezydenta RF, jakaja zachoŭvaje maŭčańnie na hetuju temu. Što tyčycca majučaha adbycca pasiadžeńnia ŭ Miensku, dyk infarmacyjnaje ahienctva RIA «Novosti» sa spasyłkaj na pres‑słužbu rasiejskaha ŭradu paviedamiła nastupnaje: «Premjer‑ministar RF Viktar Zubkoŭ abmierkavaŭ pa telefonie sa svaim biełaruskim kaleham paradak majučaha adbycca pasiadžeńnia Vyšejšaha dziaržsavietu sajuznaj dziaržavy Rasiei i Biełarusi i planavanaha prykancy śniežnia pasiadžeńnia Savietu ministraŭ sajuznaj dziaržavy».

Pra zaplanavanuju sustreču Pucina i Łukašenki — ani słova. Choć hety fakt i rasiejskuju presu pavinien byŭ by cikavić. Usio‑tki pieršy dziaržaŭny vizyt «nacyjanalnaha lidera» za miažu paśla histaryčnaj pieramohi prapucinskaj «Adzinaj Rasiei» i pierakanfihuracyi ŭłady.

Pryčym, razmova idzie navat nie pra vizyt Łukašenki ŭ Maskvu, jaki abiacaŭ, što nahi jaho bolš nia budzie ŭ Kramli, a pra vizyt Pucina ŭ Miensk, to bok na pakłon Łukašenku…I heta pavinien zrabić čałaviek, jaki vielmi pavažliva stavicca da svajoj persony. Niezdarma Pucin zaŭsiody spaźniajecca, navat na sustrečy na vyjšejšym dziaržaŭnym uzroŭni. Adnojčy jon umudryŭsia spaźnicca na spatkańnie z brytanskaj karalevaj.

Što pavinna było zdarycca nadzvyčajnaha, kab prymusić prezydenta Rasiei zabycca na ŭsie byłyja kryŭdy i pryjechać da svajho kryŭdziciela?

Niama adkazu. Ale ŭ maŭčańnia rasiejskaj presy jość davoli prostaje tłumačeńnie. I palahaje jano nie ŭ śvirepaj cenzury ci zakrytaści Kramla. Prosta ŭsia infarmacyja, u tym liku i ahienctva BiełTA, abapirajecca na vykazvańni kiraŭnika čynoŭnickaha aparatu pad nazvaj «Sajuznaja dziaržava Biełarusi i Rasiei» Paŭła Baradzina. Hety čynoŭnik siaredniaj ruki daŭno viadomy svaimi palityčnymi fantazijami na temu intehracyi Biełarusi i Rasiei. Kali brać na vieru jahonyja raniejšyja vykazvańni, dyk my, naprykład, ad pačatku 2007 hodu pavinny byli ŭžo mieć adzinuju valutu sajuznaj dziaržavy. A kolki razoŭ jon paviedamlaŭ pra padpisańnie Kanstytucyjnaha aktu, jakoje adbudziecca siońnia‑zaŭtra — nie pieraličyć. Pavinien ža kiraŭnik miždziaržaŭnaj struktury z ahromnistym štatam i niesłabym biudžetam niejak apraŭdvać svajo i hetaj struktury isnavańnie.

Hetym razam Baradzin paviedamiŭ BiełTA, što na hety momant padrychtavanyja 5 (!) varyjantaŭ kanstytucyjnaha aktu. Dalej varta pracytavać maskoŭskaha čynoŭnika na movie aryhinału: «Rieč nie idiet o vviedienii posta sojuznoho priezidienta i sojuznych ministrov. Vied́ ispołnitielnoj vłasti vpołnie možno rabotať kollehialno, kak v Jevropie. V projektie otražajetsia konfiedierativnaja modiel ustrojstv Sojuznoho hosudarstva, to jesť ostanutsia hierby, himny. Pri etom nieobchodim sojuznyj parłamient, a takžie dielehirovanije niekotorych hosudarstviennych połnomočij na sojuznyj urovień, v častnosti, połnomočij po ochranie hranicy, tamožnie, oboronie, vojenno‑tiechničieskomu sotrudničiestvu, finansovo‑krieditnoj politikie, cienovoj politikie».

Dyk usio‑tki, kanfederatyŭnaja madel «ustrojstv», ci takaja, jak ciapier u Eŭraźviazie? I ŭ čym sens vizytu Pucina ŭ Miensk? Pra što jany buduć havaryć? Raskładvać paśjans ź piaci varyjantaŭ sajuznaj kanstytucyi?

I ci ŭvohule zasłuhoŭvajuć mudryja vykazvańni čynoŭnika surjoznaj uvahi analitykaŭ?

Ale nie ŭ byłym zaŭhasie Kramla Baradzinie sprava.

U minułym stahodździ žyŭ taki irlandzki dramaturh Semiueł Bekiet, jaki ličycca zasnavalnikam «teatru absurdu». Hieroi samaj viadomaj ź jahonych pjes — «U čakańni Hado» — uvieś čas zajmajucca tym, što čakajuć niejkaha mityčnaha persanaža. Voś finał pjesy ŭ karotkim pierakazie: «Estrahon i Ŭładzimier chočuć paviesicca, ale ŭ ich niama mocnaj viaroŭki. Zaŭtra jany pryniasuć viaroŭku i, kali Hado znoŭ nia pryjdzie, paviesiacca. Jany vyrašajuć razyścisia na noč, kab ranicaj viarnucca i znoŭ čakać Hado. «Chadziem», — kaža Ŭładzimier. «Tak, pajšli», — zhadžajecca Estrahon. Abodva nie kranajucca ź miesca».

Pucin, zrazumieła, nie mityčny persanaž. Ale pavodziny tych, chto ŭvieś čas čakaje jaho pryjezdu ŭ Biełaruś, čymści nahadvajuć pavodziny hierojaŭ pjesy absurdu.

A. Ułasaŭ, hazeta "Svaboda"

Клас
0
Панылы сорам
0
Ха-ха
0
Ого
0
Сумна
0
Абуральна
0