Čym emacyjna reahavać, lepiej spakojna raskłaści ŭsio pa paličkach. Sensacyjnaje paviedamleńnie "Echa Moskvy" vyklikaje šerah pytańniaŭ.

Pa-pieršaje, našto Pucinu mienavita taki ekzatyčny varyjant praciahnieńnia ŭładnych paŭnamoctvaŭ?

"Jon moh by spakojna zładzić referendum i pajści na treci termin", — ličyć palitolah Valer Karbalevič, ź jakim my tolki što abmierkavali sensacyju. Sa słoŭ surazmoŭcy, rejtynh Pucina zabiaśpiečyŭ by jamu sapraŭdnuju pieramohu, a Zachad musiŭ by źmirycca.

Pa-druhoje, ci toj heta varyjant, jaki moža zadavolić Alaksandra Łukašenku? Siońnia i Duma, i naš Nacyjanalny schod — struktury, jakija samastojna ničoha nie vyrašajuć. "Nu a sajuzny parlament — hety budzie fantom u kvadracie", — zaznačaje Valer Karbalevič.

Ale ŭjavim sabie, što takaja kanstrukcyja (Pucin — prezydent sajuznaj dziaržavy, Łukašenka — śpikier sajuznaha parlamentu) stanovicca realnaściu.

Dva nastupstvy. Pa-pieršaje, u Rasiei faktyčna stvarajecca dvojeŭładźzdie (nie zabyvajma, što na sakavik pryznačanyja ŭžo vybary rasiejskaha prezydenta!). Kalizija Harbačoŭ — Jelcyn niekali spryčyniłasia da raspadu Savieckaha Sajuzu. Siońniašniaja Rasieja jašče mieniej tryvałaja.

Druhoje nastupstva palahaje ŭ tym, što Łukašenka vychodzić na rasiejskaje palityčnaje pole. "Jon zmoža pretendavać u perspektyvie na miesca taho ž kiraŭnika sajuznaje dziaržavy. Jon moža atrymać dostup da "iadravaj valizki". Jak na takuju perspektyvu adreahuje Zachad?", — razvažaje moj surazmoŭca.

Karaciej, ciažka ŭjavić, što Kreml, jaki ŭvieś čas rašuča adsiakaŭ mahčymaści biełaruskaha kiraŭnika zhulać na čužym poli, zaraz vyrašyŭ nažyć sabie hałaŭny bol. Małaimavierna, kab sklejenuju aby-jak Rasieju nadumali vyprabavać na tryvałaść praz stvareńnie dvuch centraŭ ułady.

Tak što versyja, ahučanaja "Echom Moskvy", moža być recham niejkaj pijaraŭskaj vajny. Zaŭvažcie, što heta nia pieršaje za apošnija dni vybuchnoje paviedamleńnie sa spasyłkaj na ananimnyja krynicy ŭ Biełarusi. Toje, što baki pierad vizytam Pucina viaduć psychalahičny dvuboj, vidavočna.

Nia vyklučana, što adnym z adrasataŭ takich syhnałaŭ moža być Zachad. U lubym vypadku, kali sustreča ŭ Miensku skončycca biez katastrafičnych dla Biełarusi nastupstvaŭ, imidž jaje prezydenta jak realnaha abaroncy niezaležnaści dziaržaŭnyja medyi natruć da blasku.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?