U vyniku sumiesnych apieratyŭna-vyšukovych mierapryjemstvaŭ kryminalnaha vyšuku ministerstvaŭ unutranych spraŭ Biełarusi i Rasii pa praviercy apieratyŭnaj infarmacyi ŭ dačynieńni da členaŭ mižnarodnaj złačynnaj hrupy vyjaŭlena schiema, pa jakoj paśla ŭtvareńnia Adzinaj ekanamičnaj prastory lehalizujecca značnaja častka skradzienaha aŭtatranspartu.

Ab hetym havorycca ŭ paviedamleńni MUS Biełarusi, padrychtavanym da pasiadžeńnia Abjadnanaj kalehii milicejskich viedamstvaŭ dźviuch krain u Breście. 

Sutnaść schiemy zaklučajecca ŭ nadańni ŭkradzienamu aŭtamabilu lehalnaha statusu šlacham mytnaha afarmleńnia na terytoryi RF jak aŭtamabila, jaki prybyŭ ź Biełarusi, z padavańniem dla hetaha padroblenych ulikova-rehistracyjnych dakumientaŭ. Skraŭšy transpartny srodak, złačyncy vyrablajuć na jaho padroblenyja ŭlikova-rehistracyjnyja dakumienty, u jakich ukazvajuć źviestki pra ŭlikovyja danyja aŭtamabila anałahičnaj marki (madeli), zarehistravanaha na zakonnych padstavach u padraździaleńniach UDAI MUS Biełarusi ci MUS Kazachstana. Adpaviedna ŭ vykradzienaj mašynie źmianiajecca i identyfikacyjny numar. Akramia taho, u padroblenyja dakumienty ŭnosicca fiktyŭnaja acenka ab tym, što aŭtamabil źniaty z uliku ŭ rehistracyjnych padraździaleńniach dziaržavy, ź jakoha nibyta prybyŭ. 

Na nastupnym etapie, jak praviła, praz pasrednikaŭ, jakija mohuć nie zdahadvacca ab kryminalnym pachodžańni mašyny, na padstavie padadzienych u mytnyja orhany Rasii padroblenych dakumientaŭ na aŭtamabil ažyćciaŭlajecca sproščanaja pracedura jaho mytnaha afarmleńnia z vydačaj lehalnaha pašparta transpartnaha srodku. Pry hetym isnujučym rehłamientam nie praduhledžany abaviazkovaja pravierka aŭtamabila, što prybyŭ dla mytnaha afarmleńnia, na pradmiet jaho źniaćcia z uliku ŭ padraździaleńniach UDAI MUS Biełarusi ci Kazachstana, a taksama ŭstanaŭleńnie sapraŭdnaści identyfikacyjnaha numara i pradstaŭlenych ulikova-rehistracyjnych dakumientaŭ. 

Paśla atrymańnia ŭ padraździaleńniach Fiederalnaj mytnaj słužby RF pašparta MS, vykarystoŭvajučy adsutnaść pamiž dziaržavami abjadnanaj bazy danych zarehistravanaha aŭtatranspartu, złačyncy ažyćciaŭlajuć bieśpieraškodnuju pastanoŭku aŭtamabila na rehistracyjny ŭlik u padraździaleńniach Hałoŭnaha ŭpraŭleńnia pa zabieśpiačeńni biaśpieki darožnaha ruchu MUS Rasii. 

U MUS Biełarusi adznačajuć, što takaja złačynnaja schiema moža być vykarystana złačyncami z adnym i tym ža aŭtamabilem niekalki razoŭ. Dla hetaha transpartny srodak papiarednie nieabchodna zastrachavać, paśla čaho fiktyŭna zajavić pra jaho kradziež dla atrymańnia ŭ dalejšym strachavoha pakryćcia. Situacyja niaredka paharšajecca tym, što pravaachoŭnymi orhanami Rasii abjaŭlajucca ŭ vyšuk aŭtamabili ź identyfikacyjnymi numarami, anałahičnymi tym, jakija raniej byli zarehistravanyja ŭ Biełarusi i z uliku nie źniatyja (aŭtamabili-»dvajniki»). U takim razie mašyny, nabytyja i zarehistravanyja hramadzianami Biełarusi na zakonnych padstavach, taksama pierachodziać u katehoryju tych, što adšukvajucca. Ciapier rasijskimi kalehami ŭ vyšuk abvieščany dzieviać aŭtamabilaŭ-»dvajnikoŭ». Pa kožnym praviedzieny pravierki, padčas jakich paćvierdžany zakonnaść ich nabyćcia, a taksama sapraŭdnaść ulikova-rehistracyjnych dakumientaŭ i identyfikacyjnych numaroŭ. 

U suviazi z hetym rasijski kryminalny vyšuk inicyjavaŭ pierad Śledčym departamientam MUS Rasii razhlad pytańnia ab mahčymaści vyšuku ŭkazanych aŭtamabilaŭ biez vykarystańnia źviestak pra ich identyfikacyjnyja numary. 

Letaś Hałoŭnaje ŭpraŭleńnie kryminalnaha vyšuku MUS Rasii, Nacyjanalnaje centralnaje biuro Interpoła ŭ Biełarusi, Hałoŭnaje ŭpraŭleńnie MUS pa Sankt-Pieciarburhu i Leninhradskaj vobłaści sumiesna z kryminalnym vyšukam MUS Biełarusi vyjaŭleny 31 vykradzieny i lehalizavany ŭ Rasii pa ŭkazanaj schiemie aŭtamabil. 

Dla vyjaŭleńnia «dvajnikoŭ» sioleta pa inicyjatyvie bakoŭ praviedziena źvierka identyfikacyjnych numaroŭ aŭtamabilaŭ asobnych marak, zarehistravanych u Biełarusi, z bazaj danych HUABDR MUS Rasii. U vyniku 28.167 identyfikacyjnych numaroŭ vyjaŭlena bolš jak u 600 aŭtamabilaŭ, jakija adnačasova zarehistravanyja ŭ Biełarusi i Rasii. U adpaviednaści z ukazańniem MUS RF pravodzicca pravierka hetych transpartnych srodkaŭ na pradmiet ustanaŭleńnia pieršapačatkovych identyfikacyjnych numaroŭ, inicyjataraŭ vyšuku i akaličnaściaŭ nabyćcia aŭtamabilaŭ ich ułaśnikami. U liku ŭkazanych vyšej transpartnych srodkaŭ vyjaŭlena bolš za 200 aŭtamabilaŭ sa źmienienymi identyfikacyjnymi numarami, jakija znachodziacca ŭ vyšuku. 

Vykarystańnie takoj schiemy, jak adznačajuć u MUS, aktualnaje i dla Biełarusi. Sioleta tolki na terytoryi Homielskaj vobłaści vyjaŭlena vosiem mašyn, pradstaŭlenych u padraździaleńni MRA UDAI UUS z padroblenymi ŭlikova-rehistracyjnymi dakumientami rasijskaha ŭzoru i źmienienymi identyfikacyjnymi numarami. Try z hetych aŭto identyfikavanyja jak vykradzienyja ŭ susiedniaj krainie. Ich numary adpaviadajuć numaram anałahičnych aŭtamabilaŭ, zarehistravanych i nie źniatych z uliku ŭ padraździaleńniach HUABDR MUS Rasii. 

Tamu biełaruski bok ličyć metazhodnym prapracavać pytańnie ab abaviazkovym kryminalistyčnym daśledavańni ŭlikova-rehistracyjnych dakumientaŭ, a taksama kamisijnym ahladzie transpartnych srodkaŭ, jakija prybyli ŭ Biełaruś z krain Mytnaha sajuza dla rehistracyi ŭ padraździaleńniach UDAI MUS Biełarusi.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?