Dva z pałovaj tydni tamu ŭ vydaŭca «Biełorusskoj diełovoj haziety», staršyni Rady Biełaruskaha instytuta stratehičnych daśledavańniaŭ (BISS) Piatra Marcava znajšli vostry lejkoz. Heta ankałahičnaja chvaroba, i jamu adrazu pačali rabić chimijaterapiju. Heta padarvała imunitet, źjavilisia ŭskładnieńni, siepsis. U subotu jon pamior, nie prychodziačy ŭ prytomnaść, raskazaŭ «Našaj Nivie» Alaksiej Pikulik, akademičny dyrektar BISS.
Raźvitańnie ź Piatrom Marcavym adbudziecca z 12.00 da 15.00 u rytualnaj zale pa vulicy Alšeŭskaha, 12 u Minsku.
Piatro Marcaŭ
Naradziŭsia ŭ 1962 hodzie. Skončyŭ fiłałahičny fakultet BDU (1984). Byŭ vymušany zvolnicca z pasady starejšaha redaktara BiełTA paśla ŭdziełu ŭ mitynhu ŭ Kurapatach.
U 1992 pačaŭ zajmacca pradprymalnickaj dziejnaściu: vydavać hazietu «Biełorusskaja diełovaja hazieta», štotydniovik «Imia». U sakaviku 2006 vychad «Biełorusskoj diełovoj haziety» byŭ spynieny ŭ suviazi z zabaronaj na jaje druk u biełaruskich drukarniach i raspaŭsiudam praz «Biełpoštu» i «Biełsajuzdruk».
Pradziusar i adzin z aŭtaraŭ scenara dakumientalnaha filma «Zvyčajny prezident» pra Alaksandra Łukašenku.
Praz ruki Piatra Marcava prajšli sotni małych i vialikich spravaŭ.
