Sudździa Centralnaha rajona Homiela Volha Kazłova, jakaja razhladaje isk sustaršyni «Maładoha frontu» Andreja Cianiuty da rektarata Homielskaha dziaržaŭnaha ŭniviersiteta imia Francyska Skaryny, pieraniesła sud na 16 vieraśnia z-za taho, što Cianiuta zapatrabavaŭ vieści praces pa-biełarusku abo pradstavić pierakładčyka.
Sustaršynia «Maładoha frontu» abskardžvaje ŭ sudzie niezakonnaje, na jaho pohlad, adličeńnie z VNU.
U sudzie Cianiuta adrazu zajaviŭ chadajnictva, kab jaho sprava viałasia na biełaruskaj movie. Sudździa zapiarečyła: u krainie dźvie dziaržaŭnyja movy i spravavodstva ŭ sudach viadziecca na ruskaj. Tady maładafrontaviec zapatrabavaŭ pierakładčyka, bo jaho rodnaja mova — biełaruskaja.
Cianiuta ličyć svajo adličeńnie z VNU palityčna matyvavanym. «Ja padaŭ skarhu ŭ sud na svoj univiersitet imia Francyska Skaryny, ź jakoha ja byŭ adličany za dva administracyjnyja spahnańni. Jany spasyłajucca na Kodeks ab adukacyi. Ale heta palityčny pieraśled, kali studenta adličvajuć całkam palityčna matyvavana. Kali b heta byŭ niejki Vasia Pupkin, jaki vypiŭ lišniaha, jaho dva razy zatrymali, upeŭnieny, što jamu b ničoha nie zrabili. Jak viadoma, u nas u Biełarusi prava pracuje vybaračna. Kali čałaviek pieraškadžaje ŭładzie, jaho represujuć — štrafujuć, sadziać i hetak dalej. Ale kali jon łajalny da ŭłady, to mohuć tolki palcam pakivać», — zajaviŭ jon.
Andrej Cianiuta vučyŭsia na trecim kursie zavočnaha fakulteta na śpiecyjalnaści «Pravaznaŭstva». Vučyŭsia na płatnaj asnovie. Niazdadzienych zalikaŭ i ekzamienaŭ nie mieŭ. Mieŭ tolki apošnim časam dva administracyjnyja spahnańni za hramadskuju i palityčnuju dziejnaść. Za raspaŭsiudžvańnie antyałkaholnych ulotak i nibyta za toje, što brydkasłoviŭ na pustynnaj vulicy, «čym parušaŭ paradak i spakoj hramadzianaŭ». Apošniaje zatrymańnie było pierad pačatkam čempijanatu śvietu pa chakiei ŭ Minsku, kali aktyvistaŭ «začyščali» i ŭ inšych rehijonach krainy:
«Heta, chutčej za ŭsio, zamaŭlaje ŭłada ci, mahčyma, Kamitet dziaržaŭnaj biaśpieki. Prosta chočuć vycisnuć ź Biełarusi», — miarkuje maładafrontaviec.
Kiraŭnik rehijanalnaj struktury «Pravavaja inicyjatyva», juryst Leanid Sudalenka, jakoha Cianiuta ŭ sud zaprasiŭ jak pradstaŭnika hramadskaści, kaža, što ni Kodeks ab adukacyi, ni praviły ŭnutranaha rasparadku ŭniviersiteta nie ŭtrymlivajuć patrabavańnia adličvać studenta za administracyjnyja parušeńni. «Kali sud dapuścić mianie pradstaŭnikom hramadskaści, ja budu havaryć pra heta: niama va ŭniviersiteta padstavaŭ adličvać Cianiutu, spyniać jaho vučobu. Tym bolš što jon — student-zavočnik, navučajecca za svoj košt», — adznačyŭ jon.
Na sudzie prysutničaŭ i pravaabaronca, dacent univiersiteta imia Francyska Skaryny Viktar Adzinočanka. «Kažu zaraz mienavita jak vykładčyk hetaha ŭniviersiteta. Inicyjatyva na adličeńnie Cianiuty — heta nie inicyjatyva ŭniviersiteta. Ni rektaru, ni dekanu zavočnaha fakulteta hetaje adličeńnie nie patrebnaje. Biezumoŭna, što ŭniviersitet budzie abaraniać svaju pazicyju, ale heta nie jaho pazicyja. U nas jość žorstkaja ŭstanoŭka, kab studentaŭ, asabliva zavočnikaŭ, jakija płaciać za svaju adukacyju, nie adličvać. Tolki kali jon sam napiša zajavu», — zajaviŭ Adzinočanka.
Aficyjny pradstaŭnik univiersiteta Valeryj Niadostup svajoj pazicyi ŭ sudzie pakul nie vykazvaŭ, bo razhlad spravy pieraniesieny. Viadomaja tolki pazicyja Ministerstva adukacyi, kudy źviartaŭsia Cianiuta. Pieršy namieśnik ministra Vadzim Bohuš adkazaŭ studentu-zavočniku, što adličany toj pravamierna.
