Namieśnik staršyni frakcyi błoka Anhieły Mierkiel CHDS/CHSS u bundestahu Michael Fuks pieraściaroh urad Hiermanii ad akazańnia ščodraj dziaržaŭnaj dapamohi Ukrainie.
«Fiederalny ŭrad nie moža raźličvać na toje, što situacyja ŭ hetaj kryzisnaj krainie hetak ža, jak u vypadku z Hrecyjaj, stabilna palepšycca za košt hrošaj niamieckich padatkapłacielščykaŭ, — skazaŭ jon u intervju anłajn-vydańniu časopisa Der Spiegel, apublikavanym u subotu, 13 vieraśnia. — U paraŭnańni z tym, što spatrebicca, kab utrymać na płavu Ukrainu, dapamoha Hrecyi była prosta drobiaźziu. Heta zusim inšyja maštaby».
Fuks — ekśpiert u śfiery ekanomiki — zaklikaŭ Kijeŭ pravieści karennyja reformy, jakija b harantavali Ukrainie ekanamičnuju budučyniu i niezaležnaść ad zamiežnaj hrašovaj dapamohi. Niamiecki parłamientaryj ličyć nieabchodnym refarmavać kanstytucyju va Ukrainie i chutka vybudavać sistemu niezaležnych orhanaŭ justycyi, jakaja dazvoliła b utajmavać šyroka raspaŭsiudžanuju karupcyju.
Michael Fuks taksama ličyć, što da sanacyi abciažaranaj hihanckimi abaviazkami krainy abaviazkova pavinna być pryciahnutaja ŭkrainskaja ekanamičnaja elita.
«Nielha mirycca z tym, kab ukrainskija aliharchi skuplali cełyja vulicy ŭ Łondanie za dziasiatki miljardaŭ, pry hetym pierakładajučy adkaznaść za vyratavańnie svajoj krainy na niamieckich padatkapłacielščykaŭ», — padkreśliŭ jon.
Pavodle acenak ekśpiertaŭ, Ukrainie da kanca 2015 spatrebicca zamiežnaja dapamoha ŭ pamiery 19 młrd jeŭra. U hetaj suviazi Fuks zaklikaŭ Hiermaniju zadumacca pra toje, što jana moža sabie dazvolić.
Na dumku kansiervatyŭnaha palityka, uradu FRH, mahčyma, užo vielmi chutka pryjdziecca dakazać, što dla jaho na samaj spravie značyć Ukraina.
Jon nahadaŭ, što krainie chopić zapasaŭ hazu tolki da studzienia, i što Rasija prypyniła dalejšyja pastaŭki paliva, pakolki Kijeŭ nie raspłaciŭsia za ŭžo atrymany haz. «Samaje poźniaje, kali ŭ Kijevie zhaśnie śviatło, a kvatery zastanucca biez aciapleńnia, my ŭžo nie zmožam adyści ad adkazu na pytańnie ab tym, na što my hatovyja pajści dziela Ukrainy», — ukazaŭ Fuks.
