Lidar partyi ŁDPR Uładzimir Žyrynoŭski abvinavaciŭ Słužbu biaśpieki Ukrainy (SBU) u zabojstvach na trasach Padmaskoŭja. Pra heta jon zajaviŭ u efiry radyjostancyi «Hovorit Moskva».
Na dumku parłamientaryja, Kijeŭ naŭmysna zasyłaje ŭ Rasiju prafiesijanałaŭ-dyviersantaŭ, jakija napadajuć na kiroŭcaŭ. «Kolki ludziej na darohach hinie? Voś ciapier užo 14 maskvičoŭ zabityja na darohach. I dzie zabojcy? SBU zasyłaje. Heta dziejničajuć prafiesijanały-dyviersanty z Ukrainy. Jany pomściać nam», — skazaŭ Žyrynoŭski.
Ź viasny 2014 na ŭčastku z 45-ha pa 85-y kiłamietr trasy M-4 «Don» byli ździejśnienyja čatyry zabojstvy. Złačyncy raskidvali šypy na darozie i, kali kiroŭcy spynialisia z prakołatymi šynami i vychodzili z aŭtamabila, rasstrelvali ich va ŭpor. Pieršy napad adbyŭsia 3 maja, achviarami stała pažyłaja para z Maskvy.
Pavodle nieaficyjnych dadzienych, apieratyŭniki rasśledujuć jašče niekalki padobnych vypadkaŭ na inšych darohach u Padmaskoŭi. Isnuje viersija, pavodle jakoj złačyncy raspravilisia ŭžo z 14 kiroŭcami i ich pasažyrami.
