Haradskoje śviata tradycyjna pravodzicca ŭ druhuju subotu vieraśnia. Sioleta Minsku spaŭniajecca 947 hadoŭ z času pieršaha zhadvańnia ŭ «Apovieści minułych hadoŭ».
Padčas śviatkavańnia arhanizavana kala 50 mierapryjemstvaŭ, ab`iadnanych ahulnaj kancepcyjaj — Hod haścinnaści, paviedamiła pres-słužba Minharvykankama.
Apoŭdni kala Pałaca sportu pačniecca kancert ŭ miežach Fiestyvalu mastactvaŭ biełarusaŭ śvietu, na jaki ŭ Minsk prybyli amal 250 udzielnikaŭ z 18 krain śvietu.
Na pierakryžavańni praśpiektaŭ Pieramožcaŭ i Mašerava ŭ 11.00 adkryjecca fiestyval «Minsk histaryčny» z udziełam členaŭ kłubaŭ histaryčnaj rekanstrukcyi. Jany ŭznoviać padziei dziesiaci stahodździaŭ historyi horada. Asablivy akcent budzie zrobleny na padziejach 1812 hoda i 1944-ha.
U 19.00 kala Pałaca sportu pačniecca kancertnaja prahrama «Miełodyi naša horada». Tut ža ŭvieś dzień budzie razhornuta vystava techniki pramysłovych pradpryjemstvaŭ Minska.
Dla dziaciej u parku Horkaha ŭ 12.00 pačniecca interaktyŭnaje śviata. U hety ž čas u parku adkryjecca bijatłonny fiestyval Dar`i Domračavaj.
Spartyŭna-moładzievaje śviata pačniecca apoŭdni kala Pałaca CHK «Junactva-Minsk» na vulicy Prytyckaha.
U Vierchnim horadzie z 12.00 da 13.00 možna budzie ŭbačyć cyrymoniju ŭziaćcia šlubu dzieviaci par.
Kala haradskoj ratušy apoŭdni pačniecca cyrymonija zakryćcia fiestyvalu vuličnych teatraŭ, buduć arhanizavanyja roznyja šou i vystavy, jakija praciahnucca da viečara.
Vystava-kirmaš «Horad majstroŭ» budzie pracavać z 11.00 da 18.00 u parku Pieramohi. U joj voźmuć udzieł ramieśniki i navučency profilnych PTV, a taksama majstry z Rasii i Litvy.
U Studenckaj vioscy ŭ 18.00 pačniecca kancert moładzievych kalektyvaŭ roznych kirunkaŭ.
Viečaram u Muzyčnym teatry adbudziecca zakrytaja cyrymonija ŭručeńnia ŭznaharod «Minčanin hoda», jakaja zavieršycca śpiektaklem «Sof`ia Halšanskaja».
Śviatočnyja mierapryjemstvy buduć arhanizavanyja taksama va ŭsich rajonach horada na tradycyjnych placoŭkach.
Zavieršycca siońniašniaje śviata fiejervierkam, jaki pačniecca ŭ 22.00. A ŭ niadzielu haradskija śviatkavańni buduć praciahvacca.
Pavodle infarmacyi HUUS Minharvykankama, na vyznačanych učastkach, dzie projduć masavyja mierapryjemstvy, buduć vystaŭleny aharodžy i ŭstanoŭleny kantrolna-prapusknyja punkty. U zony z prapusknym režymam zabaroniena pranosić ahniastrelnuju zbroju, vybuchovyja rečyvy, bojeprypasy i ich imitatary, vostryja kolučyja pradmiety i pradmiety, jakija mohuć ujaŭlać pahrozu zdaroŭju i žyćciu hramadzian. Dziejničaje taksama zabarona na pranos ałkaholnych, słabaałkaholnych napojaŭ i piva, a taksama inšaj vadkaści, za vyklučeńniem vadkaści ŭ prazrystaj tary jomistaściu da 0,5 litra.
Da miescaŭ masavych mierapryjemstvaŭ nie buduć dapuskacca hramadzianie ŭ stanie ałkaholnaha ap`ianieńnia, a taksama z bujnahabarytnymi pradmietami, žyviołami, viełasipiedami, videa- i fotaaparaturaj z dyjamietram ab`iektyvu zvyš 5 sm.
