Na druhi fiestyval mastactvaŭ biełarusaŭ śvietu, jaki projdzie ŭ Minsku 12—14 vieraśnia ŭ ramkach Dnia horada, čakajecca pryjezd pryblizna 250 udzielnikaŭ z 18 krain śvietu.
Udzielnikami fiestyvalu stanuć biełarusy z Arhienciny, Armienii, Bielhii, Hiermanii, Italii, Ispanii, Kazachstana, Kyrhyzstana, Małdovy, Mieksiki, Łatvii, Litvy, Polščy, Rasii, Ukrainy, Francyi, Šviejcaryi i Estonii.
Jak adznačyła 11 vieraśnia na pres-kanfierencyi ŭ Minsku načalnik upraŭleńnia ŭstanoŭ kultury i narodnaj tvorčaści Ministerstva kultury Natalla Zadziarkoŭskaja, asnoŭnyja mety fiestyvalu — prezientacyja dasiahnieńniaŭ suajčyńnikaŭ zamiežža i demanstracyja sacyjalna-kulturnaha patencyjału Biełarusi.
Udzielniki fiestyvalu 12 vieraśnia daduć kancerty ŭ nievialikich haradach i ahraharadkach Minskaj vobłaści. Na nastupny dzień ź ich tvorčaściu zmohuć paznajomicca minčanie: kancert — padarunak biełarusaŭ zamiežža Minsku z nahody Dnia horada adbudziecca na adkrytaj placoŭcy kala Pałaca sportu. 14 vieraśnia ŭ Biełdziaržfiłarmonii budzie dadzieny hała-kancert kalektyvaŭ mastackaj samadziejnaści biełarusaŭ zamiežža.
Pavodle mierkavańnia arhanizataraŭ, «sapraŭdnymi adkryćciami» dla biełaruskich hledačoŭ stanuć vystupleńni tvorčaha vakalnaha hurtu ispancaŭ, jaki śpiavaje na biełaruskaj movie i zachoŭvaje tradycyi biełaruskaj narodnaj tvorčaści. Arhanizatary taksama rekamiendujuć źviarnuć uvahu na małady francuzski hurt «Słavianskaja duša» ź Lijona, u repiertuary jakoha biełaruskija, ukrainskija i ruskija pieśni.
Dla haściej i ŭdzielnikaŭ fiestyvalu zapłanavana ekskursijnaja prahrama — im pakažuć znakavyja miescy Minska. Jak paviedamiła Zadziarkoŭskaja, biełarusy zamiežža naviedajuć novy muziej Vialikaj Ajčynnaj vajny, Dziaržaŭny litaraturna-miemaryjalny muziej Jakuba Kołasa, dzie zapłanavana sustreča ź biełaruskimi piśmieńnikami i paetami, a taksama Biełaruski dziaržaŭny histaryčny muziej, dzie adbudziecca adkryćcio fotavystavy «My — biełarusy», pryśviečanaj dziejnaści biełaruskich abjadnańniaŭ za miažoj.
U ramkach fiestyvalu projdzie piataje pasiadžeńnie Kansultatyŭnaha savieta pa spravach biełarusaŭ zamiežža pry Ministerstvie kultury, paviedamiŭ na pres-kanfierencyi hanarovy konsuł Biełarusi ŭ Ciumieni, staršynia abłasnoj hramadskaj arhanizacyi «Sajuz-intehracyja brackich narodaŭ» Uładzimir Šuhla.
