Eni Lenaks zaviaršaje tvorčuju karjeru. Pra heta šatłandskaja śpiavačka zajaviła brytanskaj haziecie Daily Mirror.
Pavodle słovaŭ Lenaks, takoje rašeńnie jana pryniała ŭ suviazi z žadańniem pryśviacić siabie siamji. «Zakančeńnie majoj muzyčnaj dziejnaści źviazana z adnym čałaviekam, ja ŭdziačnaja jamu za ŭsio, što jon zrabiŭ dla mianie ŭ apošnija hady», — zajaviła śpiavačka ŭ intervju vydańniu. — Nie ŭsie artysty mohuć atrymać praŭdzivuju asałodu ad žyćcia. Ja narešcie jaje adčuła i hatovaja dziela hetaha raźvitacca z karjeraj».
Jak paviedamlaje hazieta, u 2012 hodzie ŭ Łondanie Lenaks tajemna abviančałasia z 58-hadovym doktaram-hiniekołaham z Paŭdniovaj Afryki Mitčam Biesieram. Z tych časoŭ jana razam sa svaim mužam aktyŭna ŭdzielničaje ŭ dziejnaści arhanizacyj Greanpeace, Amnesty International, u kampanijach dapamohi ludziam, zaražanym virusam ŚNID, a taksama žančynam i dzieciam u krainach Afryki.
Eni Lenaks naradziłasia 25 śniežnia 1954 ŭ Abierdzinie. Jaje płaścinki ŭ pieryjad vystupu ŭ duecie z Dejvam Ściuartam (Eurythmics), a taksama paśla — padčas solnaj karjery śpiavački — razyšlisia pa śviecie tyražom 80 młn kopij. Jana była ŭdastojena amierykanskaj muzyčnaj premii Grammy, vaśmi premij Brit Awards, a taksama «Oskara» za pieśniu «Na zachad», jakaja ŭvajšła ŭ saŭndtrek filma «Uładar piarścionkaŭ. Viartańnie karala».
Eni Lenaks uklučana ŭ śpis 100 najvialikšych vykanaŭcaŭ usich časoŭ pavodle viersii časopisa Rolling Stone.
