Abrany na pasadu prezidenta Savieta Jeŭrapiejskaha sajuza premjer-ministr Polščy Donald Tusk aściarožna aceńvaje abvieščanyja siońnia ŭ Minsku damoŭlenaści ab spynieńni ahniu na Danbasie i zaklikaje dačakacca ich uvasableńnia ŭ žyćcio.
«Rasijskaja palityka ŭ dačynieńni da Ukrainy charaktaryzavałasia rezkaj źmienaj scenaryjaŭ, nievykanańniem abaviazacielstvaŭ ci damoŭlenaściaŭ. Davajcie pačakajem jašče trochi, kab pierakanaŭča havaryć, što heta pierałomny momant», — cytuje Tuska UNIAN.
«My pavinny być aściarožnymi ŭ acency hetaj padziei», — dadaŭ jon, adznačyŭšy, što nielha na sto pracentaŭ vieryć tamu, što padpisvajuć terarysty, za jakimi staić Rasija.
Donald Tusk taksama paviedamiŭ, što niadaŭna razmaŭlaŭ z prezidentam Ukrainy Piatrom Parašenkam i kiraŭnikom ukrainskaha ŭrada Arsienam Jacaniukom, jakija, pavodle jaho słoŭ, prademanstravali hatoŭnaść da «racyjanalnych i spakojnych hutarak» na temu miru na Danbasie.
«Ukrainskija lidary robiać usio, kab nie było vajny», — skazaŭ Tusk i vykazaŭ nadzieju, što siońniašnija damoŭlenaści sapraŭdy pryviaduć da jaje spynieńnia.
