Piatro Parašenka zahadaŭ Hienieralnamu štabu Ukrainy spynić ahoń u zonie antyterarystyčnaj apieracyi na paŭdniovym uschodzie krainy z 18.00, paviedamlaje pres-słužba prezidenta Ukrainy.
Zahad byŭ addadzieny paśla taho, jak ź Minska pastupiła infarmacyja pra padpisańnie pratakoła ab spynieńni ahniu na paŭdniovym uschodzie Ukrainy z 18.00 5 vieraśnia. Dakumient padpisali pradstaŭniki Ukrainy i samaabvieščanych Danieckaj i Łuhanskaj narodnych respubliki padčas pasiadžeńnia kantaktnaj hrupy pa ŭrehulavańni situacyi va Ukrainie.
«Najvyšejšaj kaštoŭnaściu źjaŭlajecca čałaviečaje žyćcio, i my pavinny zrabić usio mahčymaje i niemahčymaje dla taho, kab spynić krovapralićcie i spynić pakuty ludziej», — havorycca ŭ zajavie, apublikavanaj na sajcie prezidenta Ukrainy.
«Zychodziačy z zakliku prezidenta Rasii Uładzimira Pucina da kiraŭnikoŭ niezakonnych uzbrojenych farmiravańniaŭ Danbasa spynić ahoń, padpisańnia pratakoła na pasiadžeńni trochbakovaj kantaktnaj hrupy pa implemientacyi mirnaha płana prezidenta Ukrainy, ja addaju zahad načalniku Hienieralnaha štaba Uzbrojenych sił Ukrainy spynić ahoń pačynajučy z 18.00 5 vieraśnia», — zajaviŭ Parašenka.
Ab padpisańni mirnaha pratakoła žurnalistam u Minsku paviedamiła pradstaŭnica ABSIE Adelchiejd Taljavini. Jaje słovy paćvierdzili «premjer-ministry» ŁNR Ihar Płatnicki i DNR Alaksandr Zacharčanka.
