8 vieraśnia infarmacyjna-publicystyčny błok «Studyja «Biełsat» viartajecca z novymi prahramami dy novym farmatam. Mieniej palityki dy bolej pazityŭnych historyjaŭ, mody, navinak internetu i suśvietnaha kantekstu.

Pryhladajemsia da pakaleńnia

Volha Saŭle zaprosić vas na sustreču ź niezvyčajnymi maładymi ludźmi ŭ prahramie «Profil pakaleńnia».

«Mnie chaciełasia pakazać pazityŭnych i śmiełych maładych ludziej, jakija ździajśniajuć svaje mary, zajmajucca ŭlubionaju spravaju», – raspaviadaje Volha. – «Ja da ich prychodžu, i jany pakazvajuć mnie svoj śviet ci vučać mianie».

U hości da tych, chto bačyć śviet u kalarovych farbach, Vola Saŭle zaprašaje vas kožny čaćvier.

Pašyrajem miežy

Volha Staraścina i Siarhiej Skułaviec pašyrać dla vas miežy. Z pačatkam siezonu startuje «Śviet» – prahrama pra samyja važnyja mižnarodnyja padziei dnia, a taksama asablivaści vialikaj palityki, zakony finansavych rynkaŭ, žyćcio znakamitych ludziej dy najcikaviejšyja zdareńni.

«Palityčnaja izalacyja aficyjnaha Miensku zusim nie musić aznačać zakrytaści śvietu dla biełarusaŭ. Bo tak ci inakš, a suśvietnyja pracesy ŭ palitycy, ekanomicy, kultury dy navucy ŭpłyvajuć i na našaje žyćcio. I kab być hatovym da taho, što nam pryniasie dzień zaŭtrašni, treba viedać, što adbyvajecca siońnia. I hetaj infarmacyjaj – pa-biełarusku i biez cenzury – my hatovyja dzialicca z našymi hledačami», – raspaviadaje Volha Straścina.

Raskryvać śviet aŭtary prahramy buduć kožny budny dzień a 19.35.

Adziavajemsia stylova

Doŭhačakanaja dla ŭsioj žanočaj častki hledačoŭ prahrama pra modu. Navučenka Mižnarodnaj škoły dyzajnu adzieńnia ŭ Varšavie Volha Žarnasiek raspaviadzie pra ŭsie tajamnicy efiektnaha adzieńnia ŭ prahramie «Styl».

«Styl» na «Biełsacie» – pieršaja sproba parazmaŭlać pra modu na svajoj movie i zrazumieć asablivaści ajčynnaj fešn-industryi. Heta pakazy najlepšych dyzajnieraŭ, adsočvańnie trendaŭ i modnych hadžetaŭ. Najvažniejšaja ž misija prahramy – paznajomić hledačoŭ z tvorcami biełaruskaj mody. Taksama pryhledziemsia, jak apranajucca biełarusy na štodzień.

«Ciapier uva ŭsich modnych biełarusaŭ jość mahčymaść trapić u našyja kamiery i raspavieści pra svoj styl i ŭlubionyja rečy», – zaprašaje Volha da ŭdziełu ŭ prahramie, a taksama naviedvańnia staronki «Facebook'u», dzie buduć źjaŭlacca nie tolki vydańni prahramy, ale i najbolš cikavyja naviny sa śvietu mody.

U premjernym vypusku ŭ sieradu, 10 vieraśnia, Vola naviedaje majsterniu talenavitaha dyzajniera torbaŭ Paŭła Panaskina.

Nie zabłytajemsia ŭ pavucińni

Amatar hadžetaŭ i sučasnych technałohijaŭ Kirył Śmiahlikaŭ zanurycca ŭ virtualnyja devajsy.

«Veb-braŭzier» – łahičny praciah prahramy «Devajs», jakaja ŭžo daŭno pierastała źmiaščać u siabie naviny z suśvietu internetu dy sacyjalnych sietak. Ale vyklučna serfinham my nie abmiažujemsia!» – abiacaje Kirył.

Kirył raspaviadzie vam i pra abnaŭleńni prahramnaha zabieśpiačeńnia, i pra kampjutarnyja hulni na roznych płatformach, i, viadoma, nie pakinie biez uvahi bieźlič prahramaŭ dla mabilnych telefonaŭ, jakija roznym čynam spraščajuć našaje žyćcio!

Aproč novych prajektaŭ, u infarmacyjnym błoku «Studyja «Biełsat» čakajuć dobra viadomyja prahramy: śviežyja naviny, kamientary samych haračych padziejaŭ dnia, infarmacyja sa śvietu kultury, naviny ekanomiki, i «Razmova dnia» z majstrami žurnalistyki Uładzimiram Mackievičam, Śviatłanaju Kalinkinaju dy Maksimam Žbankovym.

Hladzicie infarmacyjna-publicystyčny błok «Studyja «Biełsat» kožny budny dzień z 18-j da 22-j hadziny dy budźcie ŭ kursie! Usie prahramy možna budzie hladzieć na sajcie telekanała ŭ anłajn-tranślacyi.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?