Vystavačny prajekt «Muziej šakaładu Nikolya» krymskaha šakałaćje Mikałaja Papova adkryŭsia 4 vieraśnia ŭ Nacyjanalnym histaryčnym muziei ŭ Minsku.
U ekspazicyju ŭvajšło bolš za 200 tvoraŭ mastactva, vyrablenych z šakaładu, marcypanu, cukrovaha draže i inšych kandytarskich praduktaŭ, abjadnanych u dva dziasiatki mastackich kampazicyj, i šerah asobnych rabot.
Šakaładnyja kampazicyi paŭstajuć u vyhladzie jajek Fabierže, karety, małoj i vialikaj karon Rasijskaj impieryi, vieniecyjanskich masak, instrumientaŭ, zbroi XVIII i XXI stahodździaŭ, antykvaryjatu, žyvioł i mnohaha inšaha. Biełarusam asabliva cikava budzie pahladzieć na šakaładny pojas Vitaŭta, aryhinał jakoha zachoŭvajecca ŭ susiedniaj zale muzieja, kafli z familnym hierbam Radziviłaŭ, a taksama śpiecyjalna vyrablenyja karciny z vyjavaj hierba Minska i budynka Nacyjanalnaha histaryčnaha muzieja.
Centralnaje miesca šakaładnaj ekspazicyi zajmajuć čatyry raboty, siarod jakich 45-kiłahramovaja Ejfieleva vieža, jehipieckaja piramida, masiŭny bieły rajal i makiet pałacavaha kompleksu ŭ Hrodnie.
Na adkryćci vystavy aŭtar rabot Mikałaj Papoŭ adznačyŭ, što zaŭsiody «maryŭ pakazać ludziam svajo ŭmieńnie» i «ŭbačyć u ich vačach pryhožaje śviatło ščaścia i dobraha nastroju». «Usie raboty byli zroblenyja tolki dla taho, kab vy atrymali estetyčnuju asałodu, adčuli šakaład nie tolki jak toje, što možna jeści, ale i ŭspryniać jaho roznuju formu, vyhlad», — skazaŭ šakałaćje i pažadaŭ haściam cyrymonii adkryćcia «sałodkaha žyćcia».
Vystava prabudzie ŭ Minsku da 9 listapada. Čas ad času Papoŭ budzie pravodzić majstar-kłasy «Akademija šakaładu» dla tych, chto žadaje navučycca abychodzicca z šakaładam nie tolki jak z łasunkam, ale i jak z materyjałam dla tvorčaści. U siaredzinie kastryčnika «Muziej šakaładu Nikolya» abiacaje pakazać u histaryčnym muziei samuju vialikuju šakaładnuju karcinu ŭ śviecie.
Mikałaj Papoŭ naradziŭsia na čarnamorskim uźbiarežžy Kryma ŭ siamji kulinaraŭ. Skončyŭ muzyčnuju škołu, škołu mastactvaŭ, vučylišča, technikum, a zatym VNU pa śpiecyjalnaści inžynier-technołah hramadskaha charčavańnia. Papoŭ nieadnarazova pryznavaŭsia lepšym šef-kucharam Kryma.
U 2006 hodzie ŭ Simfieropali adkryłasia pieršaja art-kandytarskaja Nikolya. Praz try hady ŭ stalicy Kryma pačaŭ pracavać pieršy muziej šakaładu. U 2012 hodzie druhaja art-kandytarskaja źjaviłasia ŭ Jerevanie. Letaś startavaŭ trochhadovy tur prajekta «Muziej šakaładu Nikolya» pa krainach SND i Jeŭropy.
