Adnoj z raspracovak apošnich hadoŭ vučonych Instytuta fiziki imia B.I.Ściapanava Nacyjanalnaj akademii navuk Biełarusi źjaŭlajecca mabilny łazierny śpiektromietr, śfiera vykarystańnia jakoha nadzvyčaj šyrokaja, paviedamiŭ 4 vieraśnia ŭ Minsku žurnalistam namieśnik dyrektara instytuta Michaił Bialkoŭ. 

Pavodle słoŭ vučonaha, hety aparat nie źjaŭlajecca ŭnikalnym u svaim rodzie, praktyčna anałahičny varyjant śpiektromietra «raspracavany amierykancami i ciapier lotaje pa Marsie». «My zrabili svoj nie paźniej i nie horšy», — skazaŭ jon. 

Mabilny łazierny śpiektromietr pryznačany dla analizu ćviordych rečyvaŭ na ŭtrymańnie ŭ ich roznych elemientaŭ tablicy Miendzialejeva. Najpierš hety aparat možna vykarystoŭvać dla analizu struktury budaŭničych materyjałaŭ i mietałakanstrukcyj. 

«Z dapamohaj hetaha śpiektromietra my niadaŭna analizavali stan mietałakanstrukcyj akvaparku, — paviedamiŭ Bialkoŭ. — Tam uźnikła prablema — raptam stali ržavieć mietałakanstrukcyi, choć zhodna z usioj dakumientacyjaj vykarystoŭvałasia nieržaviejučaja stal. My pravieryli, akazałasia, što sapraŭdy nieržaviejučaja stal, ale nie toj marki, jak było ŭkazana. U prysutnaści chłoru mietał iržavieŭ». 

Vykarystańnie hetaj techniki, naprykład, dla analizu materyjałaŭ pierad budaŭnictvam maštabnych zbudavańniaŭ dapamoža praduchilić ich razbureńnie, skazaŭ vučony. 

Pavodle słoŭ Bialkova, raspracoŭščykaŭ śpiektromietra «paprasili praanalizavać lustru ŭ adnym niadaŭna ŭźviedzienym budynku na pradmiet taho, ci jość u joj zołata». «My pryjechali, praanalizavali — tak, zołata jość, praŭda, słoj byŭ nastolki tonki, što ź pieršym strełam łaziera zołata pačało adlatać», — adznačyŭ jon. 

Mabilny łazierny śpiektromietr znajšoŭ svajo prymianieńnie taksama ŭ dosyć niezvyčajnaj halinie. Tak, vučonyja Instytuta fiziki ŭžo praviali cełuju sieryju analizaŭ mastackich karcin, kab pravieryć ich sapraŭdnaść. Pachodžańnie tvoraŭ mastactva praviarali pry dapamozie analizu składu farbaŭ. 

«U roznyja pieryjady historyi, naprykład, bialiły byli tytanavyja, cynkavyja, śvincovyja. Kali karcina napisanaja, naprykład, śvincovymi bialiłami, my heta vyznačajem i takim čynam možam prykładna ŭstanavić stahodździe jaje stvareńnia», — adznačyŭ Bialkoŭ.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?