U Ministerstvie zamiežnych spraŭ Biełarusi nie kamientujuć infarmacyju ab viartańni na radzimu troch biełarusaŭ, jakija z 2012 hoda znachodzilisia ŭ turmie ŭ Livii. 

Paviedamleńnie ab tym, što troje z čatyroch biełaruskich hramadzian byli vyzvalenyja i viarnulisia ŭ Biełaruś, było raspaŭsiudžana niekatorymi ŚMI niekalki dzion tamu.

Na prośbu BiełaPAN prakamientavać hetyja źviestki pres-sakratar MZS Dźmitryj Mirončyk 4 vieraśnia na bryfinhu ŭ Minsku zajaviŭ: «Ministerstva zamiežnych spraŭ Respubliki Biełaruś nie raspaŭsiudžvaje infarmacyju pa hetym pytańni i nie kamientuje jaje, zychodziačy z pryjarytetnaści zachavańnia žyćcia i zdaroŭja ŭdzielnikaŭ i toj pracy, jakaja viadziecca». 

Nahadajem, bolš za dva had tamu, u červieni 2012 hoda, vajenny sud Livii pryhavaryŭ čatyroch hramadzian Biełarusi da 10 hadoŭ turemnaha źniavoleńnia pa abvinavačańni ŭ dapamahańni režymu Kadafi. Aficyjny Minsk tady zajaviŭ, što abvinavačańnie nie adpaviadaje rečaisnaści — biełarusy pryjechali ŭ Liviju pa kantrakcie dla pracy na hramadzianskich abjektach.

Razam ź biełarusami pierad sudom paŭstali hramadzianie Rasii i Ukrainy, jakija byli pryhavorany da roznych terminaŭ turemnaha źniavoleńnia. Paźniej adzin z ukraincaŭ pamior u livijskaj turmie, a MZS Ukrainy zajaviła, što śmierć nastupiła z-za chałatnaści ŭračoŭ.

U žniŭni 2013 hoda Andrej Savinych, jaki zajmaŭ pasadu pres-sakratara MZS Biełarusi, paviedamiŭ, što pryhavor vajennaha suda Livii ŭ dačynieńni da biełaruskich hramadzian admienieny, spravu budzie razhladać hramadzianski sud. «My pakul jašče nie dabilisia patrebnaha nam vyniku, a mienavita vyzvaleńnia našych hramadzian. Ale, niesumnienna, pieradača spravy ŭ hramadzianski sud — heta surjozny krok u patrebnym nam napramku», — skazaŭ pradstaŭnik MZS.

28 žniŭnia hetaha hoda ŭkrainskija ŚMI paviedamili, što 19 ukraincaŭ, asudžanych u 2012 hodzie vajennym sudom Livii, vyzvaleny z turmy. Hetuju infarmacyju ŭkrainskamu telekanału TSN paćvierdziŭ protaijerej Zacharyja Kiarściuk, jaki znachodziŭsia z humanitarnaj misijaj u Livii i rehularna naviedvaŭ ukraincaŭ u pałonie.

Ci ŭdałosia razam z ukraincami vyzvalić hramadzian Biełarusi, pakul nieviadoma. Na hetaje pytańnie pres-sakratar biełaruskaha MZS Dźmitryj Mirončyk adkazaŭ: «Ministerstvam viadziecca adpaviednaja praca. Jaje vyniki buduć abvieščany tak i tady, kab heta nie paškodziła intaresam biełaruskich hramadzian».

Клас
Панылы сорам
Ха-ха
Ого
Сумна
Абуральна