U Śvietłahorsku 19-hadovy baksior ŭbačyŭ, jak u dom da jaho dziaŭčynie zachodzić inšy małady čałaviek. U prystupie reŭnaści jon uvarvaŭsia ŭ kvateru, žorstka źbiŭ dziaŭčynu, a potym, pahražajučy nažom, prymusiŭ maładych ludziej stać na kaleni.

Ledź nie štochvilinna jon prystaŭlaŭ da horła adnaho ź ich nož i pastajanna pahražaŭ zabić abodvuch. Akramia taho, usiu noč jon praciahvaŭ źbivać dziaŭčynu, paviedamili va UUS Homielskaha abłvykankama. Chłopiec užo maje kryminalnuju słavu ŭ horadzie.

Tamu dziaŭčyna i jaje hość nie spadziavalisia zastacca ŭ žyvych. Pra heta jany sami raspaviali śledčamu.

Pad ranicu baksior adpuściŭ znajomaha svajoj kachanaj, a jaje vyrašyŭ zabrać z saboj. Chitraściu joj udałosia viarnucca ŭ kvateru. Adtul jana vyklikała milicyju.

Z čerapna-mazhavoj traŭmaj dziaŭčyna pralažała ŭ balnicy amal dva tydni. Jość vierahodnaść, što jana moža na ŭsio žyćcio zastacca invalidam pa zroku.

Pryčyn dla reŭnaści, jak akazałasia, u jaje chłopca nie było nijakich: małady čałaviek, jaki vyklikaŭ padazreńni, pryjšoŭ da jaje, kab dapamahčy ŭstanavić prahramy na kampjutar.

Zaviedziena kryminalnaja sprava pa artykule 186 KK RB «Pahroza zabojstvam».

Sankcyi pa hetym artykule ŭklučajuć štraf abo papraŭčyja raboty na termin da adnaho hoda, abo aryšt na termin da 6 miesiacaŭ. Adnak nie vyklučajecca, što złačynstva, jakoje ździejśniŭ chłapiec, moža być pierakvalifikavana. Heta zaležyć ad stupieni ciažkaści cialesnych paškodžańniaŭ paciarpiełaj.

Клас
0
Панылы сорам
0
Ха-ха
0
Ого
0
Сумна
0
Абуральна
0