Kamitet AAN pa pravach čałavieka pryniaŭ piać novych rašeńniaŭ pa skarhach biełaruskich hramadzian. Jak paviedamlaje homielski «Centr stratehičnaj ciažby», pa ŭsich piaci skarhach kamitet ustanaviŭ parušeńni pravoŭ biełaruskich hramadzian z boku ŭrada Biełarusi.

U pryvatnaści, razhledzieŭšy skarhu žurnalistki Maryny Koktyš, jakoj u 2008 hodzie było admoŭlena ŭ pracy ŭ Pałacie pradstaŭnikoŭ Nacyjanalnaha schodu z-za niemahčymaści trapić u budynak parłamienta, kamitet pryznaŭ, što tym samym byli parušanyja jaje pravy na svabodu šukać, atrymlivać i raspaŭsiudžvać infarmacyju.

Skarha piensijaniera Paŭła Kazłova źviazanaja ź pieraśledam za krytyku supracoŭnika strachavoj kampanii ŭ liście ministru finansaŭ Biełarusi. Razhledzieŭšy hetuju spravu, kamitet pryjšoŭ da vysnovy, što, praśledujučy hramadzianina za krytyku čynoŭnika, urad Biełarusi parušyŭ jaho prava na svabodu vykazvańnia mierkavańnia.

Skarha pravaabaroncaŭ Raisy Michajłoŭskaj i Aleha Vołčaka tyčycca likvidacyi ŭ sudovym paradku hramadskaha abjadnańnia «Pravavaja dapamoha nasielnictvu». Kamitet pryjšoŭ da vysnovy, što, likvidujučy pa svajoj inicyjatyvie abjadnańnie z-za nadumanaj pryčyny, ułady tym samym parušyli prava hramadzian na svabodu asacyjacyj.

Skarha namieśnika staršyni AHP Vasila Palakova tyčycca zabarony pikietavańnia ŭ Homieli, skiravanaha na zaklik da hramadzian nie ŭdzielničać u parłamienckich vybarach 2008 hoda. Kamitet pryjšoŭ da vysnovy, što, zabaraniajučy mirny schod hramadzian, ułady kožny raz abaviazany abhruntavać, dla dasiahnieńnia jakich metaŭ abmiažoŭvajecca prava hramadzian na svabodu schodaŭ. Pakolki pa hetaj skarzie ŭrad Biełarusi nie padaŭ nijakich surjoznych arhumientaŭ, kamitet pastanaviŭ, što ŭłady parušyli prava hramadzian na svabodu mirnych schodaŭ.

Skarha viernicy Taćciany Jačnik, jakaja admoviłasia atrymlivać novy pašpart, uhledzieŭšy ŭ im antychryścijanskija simvały, i pazbaviłasia z-za hetaha mahčymaści atrymlivać piensiju, pryznanaja nieprymalnaj.

Jak paviedamiŭ BiełaPAN kiraŭnik «Centra stratehičnaj ciažby» Leanid Sudalenka, pa ŭsich skarhach, dzie pryznanyja parušeńni pravoŭ istcoŭ z boku ŭładaŭ Biełarusi, kamitet pastanaviŭ, što biełaruski ŭrad pavinien vypłacić paciarpiełym kampiensacyju ŭsich vydatkaŭ, jakija jany panieści ŭ suviazi z sudovymi razborami ŭnutry krainy, a taksama maralnuju kampiensacyju. Pry hetym jon adznačyŭ, što kamitet nie nazyvaje dakładnuju sumu maralnaj kampiensacyi. «Jaje pamier pavinien być vyznačany ŭ adpaviednaści z nacyjanalnym zakanadaŭstvam Biełarusi», — skazaŭ Sudalenka.

Akramia taho, zhodna z rašeńniem kamiteta ŭrad pavinien pierahledzieć šerah zakanadaŭčych aktaŭ (u tym liku ab praviłach i paradku akredytacyi žurnalistaŭ, praviadzieńni masavych mierapryjemstvaŭ, rehistracyi i dziejnaści hramadskich abjadnańniaŭ), praktyku ich prymianieńnia i pryniać miery pa niedapuščeńni parušeńnia pravoŭ hramadzian u budučyni.

Pa spravie Michajłoŭskaj i Vołčak kamitet taksama pastanaviŭ, što pavinna być adnoŭlenaja rehistracyja hramadskaha abjadnańnia «Pravavaja dapamoha nasielnictvu».

Sudalenka adznačyŭ, što na praciahu 180 dzion Biełaruś pavinna padać kamitetu infarmacyju ab vykanańni jaho rašeńniaŭ. Akramia taho, rašeńni kamiteta pavinny być apublikavanyja ŭ aficyjnych ŚMI na ruskaj i biełaruskaj movach.

«Na žal, na hety momant možna havaryć, što nivodnaje z rašeńniaŭ kamiteta pa skarhach biełarusaŭ biełaruskim uradam vykananaje nie było», — padkreśliŭ Sudalenka. Jon adznačyŭ, što ŭ kamitecie aficyjna zarehistravana prykładna 170 skarhaŭ, pa 70 ź jakich rašeńni ŭžo vyniesienyja na karyść istcoŭ.

«Skarhaŭ, viadoma, padajecca značna bolš, ale pryblizna 70-80% ź ich adsiejvajucca na etapie rehistracyi, bo tam jość peŭnyja pracedury, jakija nieabchodna vykanać dla taho, kab skarha była pryniataja na razhlad Kamiteta pa pravach čałavieka», — skazaŭ Sudalenka.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?