Statystyka zafiksavała vybuchovy rost ekspartu antydetanataraŭ i inhibitaraŭ. Mahčyma, havorka idzie pra «inavacyjnyja» schiemy pastaŭki naftapraduktaŭ pad vyhladam pradukcyi chimičnaj haliny, pastaŭki jakoj nie padpadajuć pad abkładańnie padatkami pry eksparcie za miežy krain Mytnaha sajuza.

Pavodle dadzienych Biełstata, ekspart tavaraŭ z kodam TN ZED MS B381190 «Inšyja antydetanatary, antyaksidanty, inhibitary smołaŭtvareńnia, zahuščalniki, antykarazijnyja rečyvy i asadki hatovyja inšyja», za šeść miesiacaŭ 2014 skłaŭ amal 105 tysiač ton na ahulnuju sumu bolš za 94 młn dalaraŭ ZŠA. Charakterna, što ekspart u naturalnym vyražeńni pavialičyŭsia ŭ paraŭnańni sa studzieniem-červieniem 2013 hoda ŭ 53 razy, u vartasnym — až u 131 raz.

Asnoŭnymi spažyŭcami biełaruskich antydetanataraŭ, antyaksidantaŭ, inhibitaraŭ i zahuščalnikaŭ, kali vieryć Biełstatu i DMK, źjaŭlajucca Niderłandy i Vialikaja Brytanija. Charakterna, što ŭ abiedźvie krainy hetyja naftapradukty ŭ 2013 hodzie nie pastaŭlalisia, a ŭžo ŭ 2014 hodzie ekspart u Niderłandy pierasiahnuŭ 45 tysiač ton i 41 młn dalaraŭ, u Vialikuju Brytaniju — 57 tysiač ton i 52 młn dalaraŭ.

Cikavaja struktura hetaha ekspartu. Da prykładu, pastaŭki ŭ krainy SND pavialičylisia tolki na 2,1%, u krainy pa-za SND — u 43 razy. Ilvinuju dolu ŭ abjomach ekspartu zajmajuć jak raz krainy dalokaha zamiežža: 6,9 tys. ton u krainy SND suprać 107,7 tys. ton — na inšyja terytoryi. U Rasieju kampanii z rehistracyjaj na terytoryi Viciebščyny vyvieźli 5,1 tysiač ton, u Kazachstan — 0,1 tys. ton.

Kardynalna adroźnivajucca i siarednija košty ekspartu. Tak, kali byłyja respubliki SSSR kuplajuć biełaruskija antydetanatary i inšyja inhibitary z zahuščalnikami pa 2105 dalaraŭ za tonu, to Jeŭropa zhodnaja tolki na 982 dalaraŭ (što ŭ 2,8 razu nižej, čym u 2013 hodzie).

Jakija ž hulcy rynku mohuć pretendavać na łaŭry lepšaha eksparciora hoda? Naprykład, u Navapołacku raźmieščanaja ŭžo viadomaja pa rastvaralna-razbaŭlalnamu biznesu kampanija «Interservis». U pieraliku asnoŭnych pradpryjemstvaŭ-eksparcioraŭ na sajcie Navapołackaha harvykankama znachodzicca sumiesnaje rasiejska-biełaruskaje TAA «ŁŁK-Naftan», jakoje vyrablaje inhibitary i antyakiślalnyja asadki. Darečy, na ŁŁK-Naftanie ŭžo viedajuć, jak pieramahčy na respublikanskim konkursie «Najlepšy pradprymalnik hoda» ŭ naminacyi «Najlepšy pradprymalnik-eksparcior». Adnak z upeŭnienaściu śćviardžać, što mienavita hetyja kampanii źjaŭlajucca aŭtarami «inavacyjnaha» biznesu, nielha. Mahčyma, heta inšaja, śpiecyjalna stvoranaja pad kankretnuju zadaču firma.

Dastatkova śpiecyfična naša kraina vyhladaje i na ŭzroŭni mižkrainavych supastaŭleńniaŭ. Uvieś suśvietny ekspart pa kodzie 381.190 u apošnija hady składaŭ paradku 2,2-2,4 młrd dalaraŭ ZŠA. Pryčym Biełaruś u lik najbujniejšych pastaŭščykoŭ nie ŭvachodziła, znachodziačysia ŭ 2013 hodzie sa svaimi 1,5 młn dalaraŭ u čaćviortym dziasiatku.

Kali b źviestki biełaruskich dziaržorhanaŭ supadali ź mižnarodnaj statystykaj, to ŭ pieršym paŭhodździ naša kraina adrazu zaniała b druhoje miesca pa vartasnym abjomu ekspartu.

Nu a ŭ naturalnym vyrazie my byli b uvohule napieradzie płaniety ŭsioj. Ale, vidać, nie los…

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?