Jan Arłoŭski

Varšaŭski politechničny ŭniviersitet (Varšava, Polšča). Śpiecyjalnaść: «elektraenierhietyka».

«Jašče miesiac tamu ja płanavaŭ pracavać u Minsku na novaŭtvoranym dziaržaŭnym pradpryjemstvie. Arhumienty «za» byli: dobry zarobak (amal jak u Polščy), cudoŭnyja ludzi (u mianie raptam źjaviłasia šmat siabroŭ u Minsku), pryhožy horad. I prajekt płanujecca vielmi sučasny, udzieł u im — vialiki honar.

Arhumient «suprać»: ja nie vieru biełaruskaj uładzie. Siońnia ja zarablaju 1500$ u rublovym ekvivalencie — i ja «pan», a zaŭtra devalvacyja (jak zaŭsiody «niespadziavanaja») — i ja žabrak. Pa-druhoje, mianie chvalujuć pierśpiektyvy. U Biełarusi, mnie zdajecca, što, pačaŭšy ad 1500$, možna zarabić jašče +30%, ale heta ŭžo stol. A ŭ Polščy hetaj stoli niama — hramadstva tak zbudavana. I ja mahu zarabić bolš, kali budu pracavać i imknucca da hetaha. I hałoŭnaja reč, jakoj ja nie vytrymaŭ — heta atmaśfiera ŭ hramadstvie i štodzionnym pobycie ŭ Biełarusi. Ludzi vielmi časta havorać pra hrošy.

Tamu ja viarnuŭsia ŭ Varšavu, znajšoŭ chutka pracu. Spadabałasia, što mianie pryniali za maje viedy, a nie za dypłom ci inšyja «papierki». Spadabałasia pierśpiektyva zarobkaŭ, bolš spakojnaja atmaśfiera ŭ hramadstvie, mahčymaści raźvićcia. Niepakoić, kaniečnie, piensija, i adčuvaju niedachop maich biełaruskich siabroŭ…

Tamu, na moj pohlad, vybirajučy pamiž Biełaruśsiu i Polščaj, prychodzicca vybirać pamiž ludźmi i zarobkam».

Jania Makarskaja

Jeŭrapiejski humanitarny ŭniviersitet (Vilnia, Litva). Śpiecyjalnaść: «miedyja i kamunikacyi: vizualnaja kultura».

«Ciapier ja pracuju prajektnym mieniedžaram u minskaj kreatyŭnaj kampanii. Ja viarnułasia ŭ Biełaruś, kab trochi papracavać, nabracca dośviedu, davučyć druhuju zamiežnuju movu, kab potym z upeŭnienaściu pastupać u niamieckuju VNU ŭ mahistraturu.

Chaču žyć u Hiermanii. Bo žyła ŭ hetaj krainie, bo tam siabry, bo prosta lublu hetuju krainu, i mnie tam kamfortna. Ci zmahu ja tam pražyć usio žyćcio — pakul skazać nie mahu».

Ryma Ciasoŭskaja

EHU (Vilnia, Litva). Śpiecyjalnaść: «kulturnaja spadčyna i turyzm».

«Ja skažu tak: univiersitet moj nazyvaŭsia «Jeŭrapiejskim», a lubovi pryščapiŭ da rodnaj krainy bolš, čym miascovy pryščaplaje svaim studentam. Ja pahladzieła na svaju krainu ź inšaha rakursu.

Zaraz pracuju pa śpiecyjalnaści ŭ biełaruskaj turfirmie. I płanuju zaŭsiody žyć tut, u Biełarusi. A na budučyniu ŭ mianie mara — adkryć svaju turfirmu i rabić niestandartnyja i tematyčnyja tury (kab našy ludzi bolš daviedvalisia ab śviatach inšych narodaŭ)».

Maryna Piatrova

EHU (Vilnia, Litva). Śpiecyjalnaść: «kulturnaja spadčyna i turyzm».

Ja pravučyłasia 2 hady ŭ BDU na śpiecyjalnaści «mižnarodnaje prava». Zrazumieła, što zusim nie majo. I pastupiła znoŭ na śpiecyjalnaść «kulturnaja spadčyna i turyzm» u EHU. U mianie tady ŭžo była praca, siamja. Tamu pytańnie pra adjezd za miažu nie staviłasia. Dyj nie było jakich-niebudź prapanoŭ dla pracy za miažoj, a ŭ Minsku ja pracavała ŭ kampanii z vydatnym kalektyvam.

Ja chacieła b pažyć u Jeŭropie. U Anhlii ci Francyi, naprykład, bo i viedaju movy, i jość znajomyja ŭ hetych krainach. Ale kankretnaj mety pierajechać za miažu ŭ mianie niama. Usio budzie zaležać ad dalejšaj ekanamičnaj i palityčnaj situacyi ŭ Biełarusi».

Jania Salenik

EHU (Vilnia, Litva). Śpiecyjalnaść: «kulturnaja spadčyna i turyzm».

«Ja płanuju znajści pracu ŭ Biełarusi, a praz hod-paŭtara — źjechać. Moža, u Jeŭropu, moža, u Amieryku. Pryčyna hetamu — režym. Nie vielmi chočacca addavać amal uvieś zarobak na charčavańnie.

Ja — realist. U Jeŭropie chapaje i svaich prablem z uzroŭniem biespracoŭja i h.d. I z raskrytymi abdymkami nas tam nie čakajuć. Tamu ja nie pajechała sprabavać siabie za miažoj adrazu. Usie ž čałavieku patrebien pracoŭny dośvied.

Kali źmienicca ŭłada i kali maja kampietentnaść budzie na patrebnym uzroŭni, ja, moža, i viarnusia, kab dapamahčy krainie raźvicca».

Vijaleta Hierasienka

EHU (Vilnia, Litva). Śpiecyjalnaść: «teoryja i praktyka sučasnaha mastactva».

«Moj dypłom daje mahčymaść pracavać u kulturnych arhanizacyjach, muziejach, fondach, pryvatnych halerejach, aŭkcyjonnych damach i ŭ mas-miedyja. Ale ciapier ja — pradaviec u kramie tavaraŭ dla tvorčaści ŭ Minsku.

Pa majoj śpiecyjalnaści ŭ Minsku nie znajšłosia zdavalniajučych varyjantaŭ. A ŭ Jeŭropie pracu ja nie šukała — jašče paśpieju».

Pavieł Šapiećka

Univiersitet Kazimira Vialikaha, Bydhašč, Polšča. Śpiecyjalnaść: «miechatronika».

«Ja płanuju viarnucca ŭ Biełaruś,tolki nie ciapier, a praz paru hadoŭ, bo spadziajusia atrymać paśviedčańnie na prava žycharstva ŭ Polščy, kab bolš nie dumać pra vizy. Uvohule, ja maru pra mabilnaść, kab jeździć jak maha bolš pa śviecie, ale ž asnoŭnaje svajo žyćcio ja ŭjaŭlaju ŭ Biełarusi. Usio ž taki ŭ Minsku ja pravioŭ bolšuju častku svajho žyćcia».

Arkadź

Univiersitet imia Łazarskaha (Varšava, Polšča). Śpiecyjalnaść: «turyzm i mieniedžmient».

«Ščyra kažučy, u Polščy nie našmat lepš, čym u nas. Kali ŭžo žyć ci pracavać za miažoj, dyk treba imknucca jechać na zachad, u Hiermaniju, Francyju, moža, Vialikabrytaniju. Pryčym, zahadzia vyvučyŭšy patrebnyja movy. Heta majo mierkavańnie, da taho ž, polski dypłom cenicca ŭ krainach ES.

A sam ja z-za siamiejnaha biznesu zastanusia ŭ Biełarusi, praciahvać baćkoŭskuju spravu. Dy i mnie zdajecca, što dzie b kolki ni płacili i što b ni prapanoŭvali, usio roŭna zaŭsiody budzie ciahnuć na baćkaŭščynu».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?