Biełaruś pakul nie nazyvaje terminy ŭvachodžańnia ŭ siłu pahadnieńnia ab małym pryhraničnym ruchu z Polščaj. Ab hetym zajaviŭ namieśnik ministra zamiežnych spraŭ Biełarusi Alaksandr Hurjanaŭ paśla IX pasiadžeńnia Biełaruska-polskaj mižuradavaj kaardynacyjnaj kamisii pa spravach transhraničnaha supracoŭnictva ŭ Minsku 15 lipienia.

Pavodle słoŭ Hurjanava, ciapier nazirajecca peŭnaje palapšeńnie dvuchbakovych adnosinaŭ pamiž Biełaruśsiu i Polščaj. Akramia taho, dadaŭ jon, pytańnie ab uvodzie pahadnieńnia ŭ dziejańnie «staviać rehijony». «Ale my chočam być hatovymi da hetaha pracesu. Pakul terminy ŭvodu nie abmiarkoŭvajem», — zajaviŭ namieśnik ministra. 

Situacyja ŭskładniajecca tym, patłumačyŭ Hurjanaŭ, što ŭ mały pryhraničny ruch pamiž Polščaj i Biełaruśsiu budzie ŭciahnuta kala paŭtara miljona čałaviek. «Z Polščaj ruch u nas zaviazany na vialiki tavara- i pasažyrapatok. Zapusk małoha pryhraničnaha ruchu nie pavinien stvaryć kałaps», — padkreśliŭ namieśnik ministra. 

Akramia taho, adznačyŭ jon, pierad uvachodžańniem pahadnieńnia ŭ siłu nieabchodna aptymizavać infrastrukturu sumiesnych pryhraničnych punktaŭ propusku, kab jany spraŭlalisia z uzrosšym patokam ludziej i hruzaŭ. 

U suviazi z hetym, paviedamiŭ Hurjanaŭ, na siońniašnim pasiadžeńni baki abmiarkoŭvali try novyja pahadnieńni. U pryvatnaści, udakładniŭ jon, razmova išła ab abnoŭlenym dahavory ab režymie sumiesnaj miažy, dahavory ab uzajemadziejańni bakoŭ na vypadak nadzvyčajnych situacyj i dahavory ab sumiesnaj ekspłuatacyi aŭta- i čyhunačnych mastoŭ na miažy. 

Pry hetym biełaruski čynoŭnik adznačyŭ, što srodki na padtrymańnie starych i budaŭnictva novych mastoŭ buduć vydzialacca jak ź biudžetaŭ Biełarusi i Polščy, tak i pa linii techničnaj dapamohi Jeŭrasajuza. 

U svaju čarhu pieršy namieśnik ministra ŭnutranych spraŭ Piotr Stachańčyk adznačyŭ, što pasiadžeńnie ŭ Minsku prajšło «ŭ vielmi družalubnaj atmaśfiery». «My havaryli ab kankretnych punktach propusku i kankretnych rečach, jakija tam treba pabudavać, kab pavialičyć tavaraabarot, pieravozku pasažyraŭ i hruzaŭ», — skazaŭ jon. 

Pavodle słoŭ Stachańčyka, polski bok pradstaviŭ biełaruskim partnioram infarmacyju ab tym, jak dziejničaje pahadnieńnie ab małym pryhraničnym ruchu pamiž Polščaj i Rasijaj, a taksama Polščaj i Ukrainaj. «Biełaruski bok raskazaŭ, što zroblena pa dahavory pamiž Biełaruśsiu i Polščaj», — dadaŭ jon. 

Nahadajem, pahadnieńni ab małym pryhraničnym ruchu nasielnictva z Łatvijaj, Litvoj i Polščaj Biełaruś padpisała jašče ŭ 2010 hodzie. Pakul dziejničaje tolki biełaruska-łatvijskaje pahadnieńnie, jakoje nabyło moc 1 lutaha 2012 hoda. Polšča i Litva ŭsio jašče čakajuć ad biełaruskaha boku paviedamleńniaŭ ab zaviaršeńni ŭsich nieabchodnych pracedur. Polšča ratyfikavała dakumient u tym ža 2010 hodzie, Litva — u 2011 hodzie. 

Miž tym u padpisańni pahadnieńnia ab małym pryhraničnym ruchu z Polščaj zacikaŭleny žychary zachodnich rehijonaŭ Biełarusi. Letaś u Hrodnie i Breście prajšli pikiety z patrabavańniem da biełaruskich uładaŭ aktyvizavać pracu pa padpisańni pahadnieńnia. Miascovyja žychary taksama sabrali tysiačy podpisaŭ pad adpaviednymi pietycyjami ŭ adras prezidenta i parłamienta, u jakich padkreślivałasia: dahavor ab małym pryhraničnym ruchu z Polščaj «zakranaje intaresy bolš čym miljona biełaruskich hramadzian».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?