U vioscy Paryž Pastaŭskaha rajonu ŭstalavanaja kopija Ejfelevaj viežy. Ažurnaje metalovaje zbudavańnie na 25 metraŭ viančaje katalicki kryž.

Miascovy ksiondz Jozas Bulka paviedamiŭ, što ažyćciavić jaho zadumu dapamahli specyjalisty pradpryjemstva «Hłybockija elektryčnyja sietki».

Śviatar kaža, što vioska Paryž rychtujecca da svajho 200‑hodździa. Tut ciapier budujecca novy kaścioł, stvarajecca muzej Jana Paŭła II, budzie pryhožy park.

«A jaki Paryž biez Ejfelevaj viežy? Vielmi pryhoža vyhladaje! Planuju tam aśviatlić kryž. Nu, tak budzie mastactva! Chacia heta dziaržaŭnaja palityka — pašyrać turyzm, ale turyzm musić być cikavym».

Narodnyja padańni śviedčać, što kolišniaje biełaruskaje pasielišča nazvaŭ Paryžam Napaleon Banapart padčas vajny 1812 hodu. Ale ŭ savieckija 1970‑ia, padčas masavych źmienaŭ tak zvanych «niemiłahučnych» i «buržuaznych» nazvaŭ, viosku Paryž pierajmienavali ŭ Navadrucak.

Viarnuli ž nazvu Paryž hod tamu. I voś što ciapier kaža staršynia miascovaha sielsavietu Jadviha Danilevič:

«Kaliści budynki KBA, kramy i stałovaj byli zakinutyja. Ciapier ksiondz Bulka tam robić ramont. Dapamahaje nam uparadkoŭvać. Ludziam heta padabajecca. Pamiać zastaniecca. Małajčyna ksiondz».

Sa słovaŭ staršyni sielsavietu Danilevič, vioska Paryž nia ŭklučanaja ŭ śpis tak zvanych ahraharadkoŭ Viciebščyny. Tutejšyja žychary, adnak, nia skardziacca.

Mierkavańnie Jaŭhienii Vasileŭskaj:

«Nu, užo ž my možam z honaram skazać: «Voś naša Ejfeleva vieža!». Pabudavali ŭžo basejn. Taksama budzie niadzielnaja škoła. Taksama budzie prytułak dla starych. Kali pažyvie naš Bulka, to ŭsio budzie!»

Ksiondz Jozas Bulka — nastajaciel kaściołu Śviatoj Hanny, što ŭ vioscy Mosar Hłybockaha rajonu. Śviatar słužyć u Biełarusi amal dvaccać hadoŭ.

Svaje spravy i namiery tłumačyć nastupnym:

«Da nas pryjaždžajuć tysiačy ludziej. Tamu my i ŭ nastupny hod budziem papaŭniać našu skarbnicu. Nia tolki ja pracuju nad hetym, ale ŭsie ludzi dałučajucca. Usie ludzi lubiać pryhažość. A pryhažość stanoŭča vychoŭvaje našu moładź».

Viačasłaŭ Kulik, Radio Free Europe / Radio Liberty

Клас
0
Панылы сорам
0
Ха-ха
0
Ого
0
Сумна
0
Абуральна
0