Respublikanski biudžet u 2013 hodzie niedaatrymaje bolš jak 17 trłn rubloŭ, miarkuje namieśnik ministra finansaŭ Biełarusi Maksim Jermałovič. Hetaja suma ekvivalentnaja dachodam biudžetu za dva miesiacy.

«Sukupnaść roznych pryčyn pryviadzie ŭ 2013 hodzie da straty respublikanskaha biudžetu (pavodle papiarednich acenak) na sumu bolš za 17 trłn rubloŭ, što ekvivalentna dvuchmiesiačnamu ŭzroŭniu dachodaŭ», — havorycca ŭ artykule Jermałoviča ŭ listapadaŭskim numary časopisa «Finansy. Učiet. Audit», jaki vydaje Ministerstva finansaŭ.

Asnoŭnyja niedapastupleńni, zhodna z acenkami Minfina, adbuducca pa: padatku na prybytak (5,2 trłn rubloŭ); padatku na zdabyču (vyjemku) pryrodnych resursaŭ (1,2 trłn); PDK (0,8 trłn); padatkovych dachodach ad źniešnieekanamičnaj dziejnaści (6,6 trłn); dyvidendach na dolu dziaržavy (3 trłn); razavym płaciažy za prava karystańnia nietrami (0,8 trłn).

«Nizki ŭzrovień pastupleńniaŭ źviazany ź niehatyŭnym uździejańniem šerahu faktaraŭ. U pryvatnaści, adstavańnie ad hrafika vyklikana zapavolvańniem tempaŭ rostu VUP. Za studzień—žnivień VUP pavialičyŭsia tolki na 1,1%, chacia pavodle vynikaŭ 2013 hoda ekanomika pavinna była zabiaśpiečyć prybaŭku ŭ 8,5%. Adpaviedna, pamier padatkovych vypłat akazaŭsia mienšy za pieršapačatkovyja čakańni», — adznačaje Jermałovič.

Adstavańnie pastupleńniaŭ biudžetu ad płana abumoŭlena taksama ŭmacavańniem kursu rubla na praciahu hoda, kanstatuje namieśnik ministra finansaŭ.

«Skaracilisia pastupleńni i ŭ vyniku zachavańnia biełaruskim rublom zališnie mocnych pazicyj. Siarednieŭzvažany kurs nacyjanalnaj valuty pavodle vynikaŭ pieršych dzieviaci miesiacaŭ skłaŭ 8.744 rubli za dołar, što nižej za ŭzrovień, udakładnieny pry farmiravańni biudžetu (8.950 rubloŭ)», — piša Jermałovič.

Pavodle źviestak Ministerstva finansaŭ, u studzieni—vieraśni 2013 hoda dachody kansalidavanaha biudžetu skłalisia na ŭzroŭni 137 trłn rubloŭ (67,8% hadavoha płana), respublikanskaha — 77,2 trłn rubloŭ (63,2% ad hadavoha płana). Pry hetym, jak adznačaje Minfin, u anałahičny pieryjad 2012 hoda hetyja pakazčyki (u pracentnych adnosinach) «byli prykmietna lepšyja».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?