U Barysavie vadziciel, jaki sprabavaŭ źniknuć na aŭtamabili ad pravaachoŭnikaŭ, narabiŭ biady na adnoj z vulic horada.

Papiaredničała ž hetym padziejam apieracyja, jakuju pravodzili supracoŭniki milicyi z metaj zatrymańnia asobaŭ, jakija zajmajucca zbytam narkatyčnych i psichatropnych rečyŭ. Pavodle danych adździeła infarmacyi i hramadskich suviaziaŭ UUS Minabłvykankama, kala dźviuch hadzin dnia pablizu budaŭničaha rynku ŭ Barysavie dźvie słužbovyja mašyny pravaachoŭnikaŭ zabłakiravali aŭtamabil "VAZ 2107", za rulom jakoha znachodziŭsia 39-hadovy miascovy žychar. Apošniaha, adnak, heta zusim nie źbiantežyła: uklučyŭšy zadniuju pieradaču, jon nacisnuŭ na haz — "Žyhuli" złamyśnika najechali na "Škodu Aktaviju" pad kiravańniem supracoŭnika milicyi i sarvalisia dalej ź miesca. Kab spynić uciekača, apieratyŭniki vykarystali tabielnuju zbroju, ale dzie tam — vadziciel imčaŭ dalej. Pravaachoŭniki vymušany byli spynić praśledavańnie, tamu što na vulicy byŭ intensiŭny ruch. Što datyčycca vadziciela "Žyhuloŭ", to jon, niby złamaŭšy hałavu, niośsia pa darozie, a na vulicy Ardžanikidzie nie spraviŭsia z kiravańniem i źbiŭ viełasipiedysta, jaki jechaŭ u spadarožnym napramku. Paśla hetaha mašyna vyjechała na tratuar, dzie pad jaje koły trapiŭ jašče i piešachod, i pierakuliłasia. Hetym adnak sprava nie abmiežavałasia: kulajučysia, aŭto sutyknułasia ź jašče adnoj mašynaj — "HAZ-3302-3", jakaja stajała na prajeznaj častcy. Piešachod i pasažyr "VAZ 2107" atrymali cialesnyja paškodžańni i byli źmieščany ŭ balnicu, uciakač zatrymany i źmieščany ŭ izalatar.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?