Doktar-traŭmatołah zaraziŭsia hiepatytam S u balnicy 12

Siarhiej Małašenku — 27 hadoŭ. Jon piša: «Ja — doktar-traŭmatołah filijała № 8 Homielskaj centralnaj haradskoj palikliniki. Mnie terminova nieabchodna darahoje lačeńnie ad hiepatytu S, jakim ja zaraziŭsia ŭ paliklinicy, vykonvajučy svaju pracu».

«Płanujučy z žonkaj ciažarnaść, my vyrašyli z prafiłaktyčnaj metaj zdać asnoŭnyja analizy ŭ krasaviku 2013 hoda. U mianie akazalisia mocna pavyšanyja piačonačnyja fiermienty, u 30 razoŭ vyšejšyja za normu. … U vyniku akazałasia, što ŭ mianie chraničny hiepatyt S.

Budučy doktaram, uvachodžu ŭ hrupu ryzyki pa hiepatytu S, tamu pieryjadyčna nam robiać analiz na markiery hiepatytaŭ.

Apošni raz u śniežni 2011 hoda hety analiz byŭ admoŭnym. Heta značyć infikavany ja prykładna na praciahu apošniaha hoda, paśla pačatku pracy ŭ paliklinicy.

Hety virus pieradajecca tolki praz kantakt z kryvioju.

Jakich-niebudź miedycynskich umiašańniaŭ, naviedvańniaŭ zubnoha, pieralivańniaŭ kryvi za hety čas u mianie nie było. U mianie niama tatuirovak, ja nie ŭžyvaju narkotyki. Heta značyć, vyklučany lubyja sposaby zaražeńnia akramia jak padčas svajoj prafiesijnaj dziejnaści, bo ŭ pracesie raboty pastajanna davodzicca mieć kantakt z kryvioju, naprykład, padčas apracoŭki i ŭšyvańnia ran, vydaleńnia śpic z kostak i inš".

«U suviazi z hetymi padziejami abśledavali na hiepatyt i žonku. Na ščaście, u jaje ŭsio dobra i virus nie vyjaŭleny», — piša Siarhiej.

Zatrymlivać lačeńnie vielmi niebiaśpiečna, bo heta zapaleńnie ŭ piečani pryvodzić da raźvićcia fibrozu, cyrozu i raku piečani.

Adzina mahčymaje lačeńnie pry majoj formie zachvorvańnia i vidzie virusa, jakoje daje nadzieju pazbavicca ad virusa, źjaŭlajecca kambinavanaja terapija piehieliravanymi interfieronami i rybavirynam na praciahu 1 hoda. Košt preparataŭ na 4 tydni na 9 červienia składaje kala 10.700.000 rub. (kala $ 1230). Poŭny kurs abyjdziecca ŭ 14760 dalaraŭ.

U Biełarusi hetyja preparaty nie dajucca dziaržavaj biaspłatna. A z maim zarobkam kala 400 dalaraŭ kupić ich samastojna nie ŭjaŭlajecca mahčymym.

Nieabyjakava da majoj prablemy pastavilisia kalehi, za što ja im ščyra i vielmi mocna ŭdziačny, im udałosia sabrać kala 1800 dalaraŭ, što razam sa svaimi asabistymi źbieražeńniami dazvalaje nabyć preparaty na 2 miesiacy lačeńnia. Dziakujučy hetaj dapamozie, 11 červienia pačaŭ kurs supraćvirusnaj terapii.

Pieraryvać lačeńnie nielha, inakš jano nie tolki nie akaža efiektu,

ale i razaŭje ŭ virusa ŭstojlivaść da hetych preparataŭ, što zrobić bieskarysnym nastupnaje prymianieńnie hetych preparataŭ.

Tamu vymušany źviarnucca pa dapamohu da nieabyjakavych ludziej, bo asabistyja finansavyja mahčymaści nie dazvalajuć samastojna spravicca z hetaj prablemaj.

Usie paćviardžajučyja źviestki na sajcie Siarhieja Małašenki