U Biełarusi sistema tax free moža realna pačać pracu da vieraśnia, zajaviŭ ministr handlu Biełarusi Valancinaŭ Čakanaŭ na pres-kanfierencyi ŭ Minsku 24 lipienia.

U Biełarusi apierataram tax free stała RUP «Biełmytniaservis», partniorami apieratara — RUP «Biełpošta» i AAT «AAB «Biełarusbank». Pavodle słoŭ Čakanava, na praciahu najbližejšaha miesiaca bujnyja biełaruskija mahaziny pavinny padpisać dahavory z apierataram. «Ministerstva handlu sumiesna z abłasnymi ŭpraŭleńniami handlu aktyŭna sadziejničaje ŭ zaklučeńni takich dahavoraŭ. Na praciahu 30–40 dzion budzie raspracavany prahramny pradukt, jaki źviaža ŭsich udzielnikaŭ pracesu — banki, poštu, mahaziny, mytniu i apieratara», — adznačyŭ ministr.

Jon taksama padkreśliŭ, što takija prahramnyja pradukty pracujuć pakul nie va ŭsich krainach i «bolšuju častku infarmacyi davodzicca zapisvać u ček uručnuju».
«Taki padychod dazvolić minimizavać upłyŭ čałaviečaha faktaru, paskoryć praces afarmleńnia i dazvolić paćviardžać dakładnaść dakumientaŭ», — rastłumačyŭ Čakanaŭ.

***

Nahadajem, 1 studzienia 2013 hoda ŭ Biełarusi pačała dziejničać sistema tax free. Heta aznačaje, što zamiežnyja hramadzianie, jakija naviedali krainu, mohuć atrymać sumu PDK pa sistemie tax free u punktach propusku, dzie znachodziacca strukturnyja padraździaleńni bankaŭ. Minimalny košt pakupak pry viartańni PDK — 800 tysiač rubloŭ, pryčym tavar pavinien być nabyty ŭ adnym mahazinie na praciahu adnaho pracoŭnaha dnia.

Sumu padatku viartać nie buduć u tych vypadkach, kali tavar u Biełarusi vyzvaleny ad PDK ci pa im prymianiajecca panižanaja staŭka. Heta, naprykład, datyčycca charčovych tavaraŭ, jakija ŭ Biełarusi abkładajucca pa panižanaj staŭcy. Akramia taho, nie padlahaje viartańniu PDK na padakcyznyja tavary (ałkahol, tytuń).

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?