Ci pahražaje Biełarusi zahadkavy virus 71-ha typu?

Vypadkaŭ zachvorvańnia, vyklikanych enteravirusnaj infiekcyjaj (EVI) 71-ha typu, jakaja zarehistravanaja ŭ Rastovie-na-Donie (Rasija), u Biełarusi niama,

paviedamiła zahadčyca łabaratoryi infiekcyj z pryrodnym reziervuaram Respublikanskaha navukova-praktyčnaha centra epidemijałohii i mikrabijałohii Tamara Amvrośjeva na pres-kanfierencyi ŭ Minsku 16 lipienia.

Pavodle jaje słoŭ, virus bolš charakterny dla krain Paŭdniova-Uschodniaj Azii.

Rasspažyŭnahlad, u svaju čarhu, paviedamlaje, što ŭ Rastovie-na-Donie zachvareli dzieci ŭ dziciačym sadku, adno dzicia pamierła. Zachvorvańnie praciakaje ŭ ciažkaj i siaredniaciažkaj kliničnaj formie. Na terytoryi Rasijskaj Fiederacyi enteravirus 71-ha typu raniej vydzialaŭsia pry sparadyčnym zachvorvańni ŭ Chabaraŭsku ŭ 1989 i 2011 hadach, u Respublicy Buracija ŭ 2004 hodzie, u Staŭrapolskim krai ŭ 2012 hodzie.

U 2007 hodzie ŭ KNR byli zarehistravanyja 83.344 vypadki EVI, 17 ź jakich zaviaršylisia śmierciu, u 2008 hodzie — 61.459 vypadkaŭ (41 sa śmiarotnym vynikam). Najbolš vysokaje zachvorvańnie adznačałasia ŭ dziaciej va ŭzroście da 10 hadoŭ.

EVI 71-ha typu adnosicca da hrupy kišačnych virusaŭ, adnak jaje klinika nietypovaja,

bo, zaznačyła Amvrośjeva, jana vyklikaje VRI: ź`iaŭlajecca nasmark, anhina — «mała što ŭkazvaje na kišačnuju infiekcyju». Druhaja faza zachvorvańnia vyklikaje kišačnyja simptomy i nieŭrałahičnyja ŭskładnieńni, až da mieninhitu.

Krynicaj infiekcyi ź`iaŭlajecca chvory čałaviek ci bieśsimptomny virusanośbit.

Virus vydzialajecca z nasahłotki ci ź fiekalijami, a taksama ź viezikularnych vysypańniaŭ. Moža niekalki dzion isnavać u navakolnym asiarodździ, tamu dla inficyravańnia nieabaviazkovy niepasredny kantakt.

Pakolki raspaŭsiudžańnie virusu niekiravanaje (vakcyny ad jaho niama), va ŭmovach adzinaj mytnaj prastory i svabodnaha pieramiaščeńnia ludziej nielha vyklučyć ź`iaŭleńnie jaho ŭ Biełarusi, skazała Amvrośjeva.

Sansłužba krainy, zaznačyła śpiecyjalist, hatova da dyjahnastavańnia enteravirusnaj infiekcyi 71-ha typu. Dla hetaha jość usie nieabchodnyja reahienty, majucca taksama miedykamienty dla lačeńnia.

Kab źvieści ryzyku zaražeńnia infiekcyjaj da minimumu, rekamiendujecca pić tolki varanuju ci butylavanuju vadu i napoi ŭ fabryčnaj rasfasoŭcy, staranna myć sadavinu i aharodninu vadoj harantavanaj jakaści, vyklučać pry kupańni ŭ adkrytych vadajomach, basiejnach traplańnie vady ŭ rot.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH