Karcina Nikasa Safronava «Partret Łukašenki ŭ kaściumie Francyska Skaryny» na vystavie ŭ Breście. Fota «Briestskoj haziety».
Siońnia hubiernatar Bresckaj vobłaści Kanstancin Sumar «asabista pavioz kiraŭniku krainy» karcinu viadomaha rasijskaha mastaka Nikasa Safronava «Partret Łukašenki ŭ kaściumie Francyska Skaryny».
Adnak jak karcina akazałasia va ŭładańni biełaruskich čynoŭnikaŭ? Dyrektar filii Bresckaha abłasnoha krajaznaŭčaha muzieja «Mastacki muziej» Vasil Hulajeŭ paviedamiŭ «NN», što karcina stała spantannym padarunkam ad samoha Safronava.
«U hubiernatara Sumara była ŭračystaja viačera. Na joj Sumar paviedamiŭ, što na nastupny dzień [4 červienia] pajedzie ŭ Minsk. I raptam Nikas Safronaŭ skazaŭ, što doryć hetuju karcinu Alaksandru Łukašenku. Atrymałasia akazija — partret akazvajecca ŭ Sumara, a ŭžo ranicaju toj pieradaść jaho Łukašenku. Tamu admysłova dla hetaha ŭviečary adamknuli muziej, źniali partret z ekspazicyi, i siońnia Sumar advioz jaho ŭ Minsk», — patłumačyŭ Hulajeŭ.
Vystava znakamitaha rasijskaha mastaka Nikasa Safronava adkryłasia ŭ Breście ŭ paniadziełak. Safronaŭ napisaŭ partrety mnohich palitykaŭ i mastackich dziejačaŭ: prezidenta Rasii Pucina, abodvuch Bušaŭ, šmatlikija partrety zorak halivudskaha i jeŭrapiejskaha kino, viadomych muzykaŭ.
Łukašenka nie paziravaŭ Safronavu asabista, ale ŭ intervju «Briestskoj hazietie» mastak
paviedamiŭ, što «takaja damoŭlenaść jość» i «hetaja praca jašče budzie».
