Amal 4 tysiačy abituryjentaŭ pryjšli ŭ punkty rehistracyi ŭdzielnikaŭ centralizavanaha testavańnia 1 červienia.Heta byŭ, darečy, apošni dzień, kali možna było atrymać propuski na centralizavanaje testavańnie.
Ale ŭ Respublikanskim instytucie kantrolu viedaŭ nie ździŭlajucca takoj vialikaj kolkaści ludziej, jakija adkładvali svoj vizit u punkty rehistracyi litaralna na apošni momant.
— Da siaredziny maja my rehistravali prykładna pa 7 tysiač čałaviek štodnia, ale zatym aktyŭnaść z boku abituryjentaŭ źmienšyłasia — da 4-5 tysiač. 3967 čałaviek my zarehistravali 1 červienia, — raskazaŭ dyrektar Respublikanskaha instytuta kantrolu viedaŭ Mikałaj Fiaśkoŭ. — Nikoli jašče ŭ apošni dzień punkty rehistracyi nie pustavali.Chutčej, nas ździŭlaje inšaje: kožny hod znachodzicca niekalki dziasiatkaŭ maładych ludziej, jakija nie zarehistravalisia na centralizavanaje testavańnie ŭ vyznačanyja dni. Tłumačeńni hučać samyja roznyja: nie viedaŭ, zabyŭsia, pierabłytaŭ, chvareŭ, znachodziŭsia za miežami krainy i hetak dalej. Byccam by ludzi znachodziacca ŭ infarmacyjnym vakuumie... I sioletni hod, na žal, taksama nie staŭ vyklučeńniem: "niapamiatlivyja" telefanujuć u Instytut kantrolu viedaŭ z prośbami ŭvajści ŭ ich stanovišča i dazvolić im zarehistravacca. Maŭlaŭ, škada hublać ceły hod i čakać nastupnaj pryjomnaj kampanii... Adnak 1 červienia paśla zakryćcia punktaŭ rehistracyi aŭtamatyzavanaja sistema rehistracyi była adklučana, i my ŭžo ničym im dapamahčy nie možam.
Mikałaj Fiaśkoŭ raskazaŭ, što sioleta dla ŭdziełu ŭ centralizavanym testavańni zarehistravalisia 117 768 čałaviek, jakija aformili 327 886 propuskaŭ. Dla paraŭnańnia: letaś pra svajo žadańnie paŭdzielničać u pryjomnaj kampanii na ŭzroŭni rehistracyi na CT zajavili 141 555 čałaviek.Takim čynam, kolkaść pretendentaŭ na studencki bilet davoli istotna skaraciłasia. Viadoma, skaraciłasia i kolkaść vypusknikoŭ škoł — da 59 tysiač, što na 6,4 tysiačy čałaviek mienš, čym letaś. Nie varta zabyvać taksama, što sioleta nižni paroh testavaha bała dla pretendentaŭ na vyšejšuju adukacyju byŭ pavyšany, i ŭ Ministerstvie adukacyi navat padličyli, što kala 30% abituryjentaŭ mohuć jaho nie pieraadoleć. Miž inšym, ahulny pryjom na ŭzrovień vyšejšaj adukacyi ŭ 54 VNU składzie ŭ 2013 hodzie 79,3 tysiačy čałaviek: 30,5 tysiačy čałaviek płanujecca pryniać na navučańnie za košt srodkaŭ respublikanskaha biudžetu i 47 tysiač — na płatnaje navučańnie.
Pakolki biełaruskaja mova praciahvaje zdavać siarod abituryjentaŭ svaje pazicyi, samaj masavaj dyscyplinaj na CT akazałasia rasijskaja mova: na jaje zarehistravalisia 83 829 čałaviek. A na biełaruskuju aformili propuski ŭsiaho 33 564 čałavieki.Druhoj pa masavaści stała matematyka — bolš jak 76 tysiač achvotnych. Na centralizavanaje testavańnie pa fizicy było aformlena i vydadziena 35 756 propuskaŭ, pa chimii — 14 705, bijałohii — 24 658, hieahrafii — 1899. Na test pa anhlijskaj movie zarehistravalisia 23 389 čałaviek, a na ispanskuju movu — tolki 248. Hramadaznaŭstva ŭ punkty praviadzieńnia testavańnia pryjduć zdavać 8250 čałaviek, suśvietnuju historyju najnoŭšaha času — 1491, historyju Biełarusi — 19 174.
Jak viadoma, va ŭsich udzielnikaŭ centralizavanaha testavańnia jość prava jašče padčas rehistracyi na CT vybirać, na jakoj ź dźviuch dziaržaŭnych moŭ jany žadajuć zdavać CT.
Sioleta pisać test pa historyi Biełarusi na biełaruskaj movie pažadali ŭsiaho 18,8% ad ahulnaj kolkaści tych, kamu treba zdavać hety pradmiet.U 2012 hodzie anałahičny pakazčyk składaŭ 23,5% ad ahulnaj kolkaści, a ŭ 2011 hodzie — kala 33%.
Fiziku i matematyku na biełaruskaj movie buduć zdavać krychu bolš jak 5% udzielnikaŭ CT, hieahrafiju — 4,5 %, hramadaznaŭstva — kala 2%.
CT startuje ŭ Biełarusi 14 červienia.I pieršymi ŭ punkty praviadzieńnia CT pryjduć abituryjenty, jakija pažadali zdavać rodnuju movu.
Ci znojducca achvotnyja ŭ nastupnym hodzie, ciažka skazać, bo ŭ 2014 hodzie źmiest testaŭ pa biełaruskaj movie budzie składacca ŭžo z ulikam novaj biełaruskaj arfahrafii.
0
0
0
0
0
0
