Uładzimir Pucin i Viktar Janukovič abmiarkoŭvali dva asnoŭnyja palityka-ekanamičnyja pytańni. Heta adnosiny Ukrainy z Mytnym sajuzam i budučynia ŭkrainskaj hazatranspartnaj sistemy i cenaŭ na haz. Biełaruś maje ŭvažliva pryhladacca da hetaj prablemy taksama, bo dačynieńni Maskvy i Minska ciesnym čynam zaležać ad ŭkrainska-rasijskaha hazavaha pytańnia.

Ukrainskaja ekanomika zadychajecca pad ciažaram zachmarna vysokich cenaŭ na rasijskija naftu i haz. Kali Biełaruś atrymlivaje błakitnaje paliva pa 165 dalaraŭ za tysiaču kuboŭ, Ukraina płacić bolš za 400! Toje samaje i z naftaj. Heta robić ukrainskuju pradukcyju niekankurentazdolnaj i rezka abnižaje ŭzrovień žyćcia siaredniaha ŭkrainca.

Maskva choča prymusić svajho najbolšaha zachodniaha susieda da «biełaruskaha varyjanta» — pieradačy hazapravodaŭ na terytoryi Ukrainy pad kantrol «Hazprama». Mienavita kančatkovy prodaž «Biełtranshaza» pryvioŭ da istotnaha panižeńnia cenaŭ dla Biełarusi. Druhim bonusam stała ŭstupleńnie našaj krainy ŭ Mytny sajuz i Adzinuju ekanamičnuju prastoru, faktyčna, pravobraz novaj Rasijskaj impieryi, jakaja na hety raz budujecca ekanamičnymi i enierhietyčnymi vaharami.

Mytny sajuz Ukraina dla siabie vyklučaje. Kijeŭ trymajecca stratehičnaha kursu na ŭstupleńnie ŭ Jeŭrasajuz. Nad Dniaprom jeŭraintehracyi ličać zarukaj zachavańnia niezaležnaści. A voś ułasnaściu hazatranspartnaj sistemy ŭkrainskija pramysłoŭcy hatovyja byli b padzialicca. U Kijevie spadziajucca, što heta dapamoža abnizić ceny chaj sabie nie da biełaruskaha ŭzroŭniu, ale chacia b da 260–280 dalaraŭ za kub. Inačaj ukrainskaja mietałurhija i chimija akažucca stratnymi. A mienavita jany stvarajuć asnovu dziaržaŭnaha biudžetu. VUP Ukrainy na dušu nasielnictva i biez taho ŭžo ŭdvaja mienšy za anałahičny pakazčyk Biełarusi.

Jak paviedamlaje hazieta «Kommiersant-Ukraina» sa spasyłkaj na krynicy ŭ Minenierha Ukrainy, Kijeŭ i Maskva ŭžo bolš za paŭhoda viaduć pieramovy ab stvareńni kansorcyuma na bazie ŭkrainskaj HTS ŭ abmien na źnižeńnie ceny hazu. Pieršy namieśnik kiraŭnika kamiteta rasijskaj Dziarždumy pa pryrodnych resursach, pryrodakarystańni i ekałohii Valeryj Jazieŭ nie vyklučaje sastupak Ukrainie pa canie hazu ŭ vypadku, kali pierad Rasiejaj paŭstanie vybar — stracić ŭkrainski rynak abo zastacca na im, źniziŭšy ceny.

Paralelna Ukraina raspačała ambitnuju prahramu raźviedki i raspracoŭki radoviščaŭ słancavaha hazu, atrymańnia vuhalnaha hazu i raźviedki na šelfie Azoŭskaha mora. Dziakujučy dabudovie novych pieramyčak ukrainski «Naftahaz» atrymaŭ pieršy haz z Zachadu, sa Słavaččyny i Vuhorščyny. Tym nie mienš, rasijski haz zastajecca najpieršaj krynicaj enierhii dla Ukrainy.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?