Zaŭziataram dazvolać pranosić bieł-čyrvona-biełyja ściahi na trybuny, ale nielha budzie imi razmachvać, takoje kampramisnaje rašeńnie pryniała Mižnarodnaja fiederacyja chakieja.Heta stała vynikam kampanii pratestu, jakuju razharnuli biełarusy. Jany zasypali chakiejnuju fiederacyju listami z krytykaj zabarony karystańnia bieł-čyrvona-biełymi ściahami na matčach. Jaje ŭviali z padačy łukašenkaŭskich čynoŭnikaŭ. U adkaz u Stakholmie adbyŭsia pikiet u padtrymku bieł-čyrvona-biełych ściahoŭ.
Padčas pikietu ad šviedskich žurnalistaŭ stała viadoma, što Mižnarodnaja chakiejnaja fiederacyja dazvoliła pranosić bieł-čyrvona-biełyja ściahi na matč, ale ich rekamiendujecca trymać na plačach, razmachvać imi nielha.
Nahadajem, 5 traŭnia na matčy Biełaruś-Słavienija, jaki prachodziŭ u Šviecyi ŭ ramkach Čempijanatu śvietu pa chakiei, za sprobu raźviarnuć vializny bieł-čyrvona-bieły ściah dvum chłopcam-biełarusam palicejskija vykrucili ruki i vyvieli ich z areny.
Dniom raniej na matčy Biełaruś - Čechija biełaruskija zaŭziatary raźviarnuli hihancki bieł-čyrvona-bieły ściah i charuhvy z vyjavaj hierba «Pahonia». Arhanizatary čempijanatu śvietu ŭ Šviecyi vyklikali na trybuny, dzie siadzieli biełaruskija zaŭziatary, palicyju. Kali palicyja pasprabavała zharnuć bieł-čyrvona-biełyja ściahi, na abaronu biełarusaŭ ustali šviedskija zaŭziatary. U vyniku zabaronienyja ŭładami simvały zastalisia na trybunach da kanca matču.
