Čatyrnaccać hadoŭ tamu, 7 maja 1999 hoda, pry niavyśvietlenych abstavinach u centry Minska źnik hienierał Juryj Zacharanka.
Zacharanka naradziŭsia ŭ 1952 hodzie. Padčas vybaraŭ pieršaha prezidenta Biełarusi ŭvachodziŭ u kamandu Alaksandra Łukašenki. U 1994—1996 hadach kiravaŭ MUS. Uvajšoŭšy ŭ apazicyju, u 1998 hodzie były ministr uznačaliŭ kamitet pa biaśpiecy "cieniavoha" ŭrada. Viasnoj 1999 hoda aktyŭna ŭdzielničaŭ u arhanizavanaj apazicyjaj kampanii pa vybarach prezidenta. Jon uvajšoŭ u kamandu eks-premjera Michaiła Čyhira, jeździŭ pa krainie, arhanizoŭvaŭ hrupy pa zbory podpisaŭ.
Karystajučysia aŭtarytetam siarod supracoŭnikaŭ MUS, Zacharanka stvaryŭ alternatyŭny sajuz aficeraŭ. Pavodle adnoj ź viersij, mienavita heta i stała asnoŭnaj pryčynaj raptoŭnaha źniknieńnia byłoha ministra.Jaho vykrali viečaram 7 maja ŭ rajonie vulicy Mahiloŭskaj u Minsku pa darozie damoŭ. Nieŭzabavie siamja Zacharanki atrymała palityčny prystanak ŭ Hiermanii.
Rasśledavańnie spravy pa fakcie źniknieńnia Zacharanki tak i nie zavieršana. Pavodle słoŭ pravaabaroncy Aleha Vołčaka, jaki źjaŭlajecca davieranaj asobaj siamji Zacharanki, raz na try miesiacy jon atrymlivaje ad śledčych orhanaŭ paviedamleńnie ab čarhovym praciahu papiaredniaha rasśledavańnia. «U apošnim paviedamleńni havaryłasia ab pradaŭžeńni spravy da červienia», — paviedamiŭ jon BiełaPAN.
Siońnia ranicaj pravaabaroncy majuć namier naviedać 89-hadovuju maci Juryja Zacharanki, jakaja žyvie adna ŭ pasiołku Vasilevičy Rečyckaha rajona Homielskaj vobłaści.Pavodle słoŭ Vołčaka, maci źnikłaha apazicyjaniera pavinna pastavić podpis u padrychtavanym zvarocie ŭ prakuraturu. «Nieabchodna pryciahvać da spravy jak maha bolš uvahi. Na žal, papiarednija zvaroty ŭ śledčyja orhany (a ich było nakiravana ŭžo paŭtara dziasiatki) nie dajuć jasnaści, jak idzie śledstva», — adznačyŭ jon.
Sprava pa fakcie zabojstva Zacharanki była raspačata 17 vieraśnia 1999 hoda na padstavie artykuła 101 KK (naŭmysnaje zabojstva). Heta značyć, što 17 vieraśnia 2014 hoda jano moža być spyniena ŭ suviazi z zakančeńniem terminu daŭnaści dla pryciahnieńnia vinavatych da adkaznaści. Biełaruskija pravaabaroncy majuć namier damahacca pierakvalifikacyi artykuła spravy na artykuł 128 KK (złačynstva suprać čałaviečnaści), jakaja nie maje terminu daŭnaści.
Varta adznačyć, što źniknieńnie Zacharanki stała pieršym hučnym źniknieńniem u Biełarusi ludziej, jakija ličacca praciŭnikami Łukašenki.Tak, 16 vieraśnia 1999 hoda bieź viestak źnikli deputat Viarchoŭnaha Savieta XIII sklikańnia Viktar Hančar i biźniesmien Anatol Krasoŭski, a letam 2000-ha źnik žurnalist Dźmitryj Zavadski, niekali asabisty apieratar Łukašenki.
Paśla byli apublikavany dakumienty, u tym liku rapart namieśnika ministra ŭnutranych spraŭ Mikałaja Łapacika, jakija śviedčyli, što z apazicyjnymi palitykami i hramadskimi dziejačami raspraviŭsia «eskadron śmierci».Zahady jamu nibyta addavała vyšejšaje kiraŭnictva krainy. Siarod tych, chto maje dačynieńnie da vykradańniaŭ i zabojstvaŭ, zhadvaŭsia i były kiraŭnik MUS Juryj Sivakoŭ; jamu paśla, jak i šerahu inšych biełaruskich čynoŭnikaŭ, z-za hetaha byŭ zabaronieny ŭjezd na terytoryju Jeŭrasajuza.
7 maja Abjadnanaja hramadzianskaja partyja, členam jakoj źjaŭlaŭsia Zacharanka, płanavała pravieści pikiety z patrabavańniem realnaha rasśledavańnia spraŭ źnikłych palitykaŭ. Było padadziena prykładna 60 zajavak na praviadzieńnie akcyj va ŭsich abłaściach i ŭ Minsku, ale nie adnu ź ich ułady nie zadavolili.
