Prajezd da kompleksa pierakryty.
Prajezd da kompleksa pierakryty.
Asabistyja aŭto supracoŭnikaŭ kompleksa pryparkavanyja kala pasta milicyi.
Kompleks pa vytvorčaści śvininy «Uschodni» ŭ Baranavickim rajonie ŭžo niekalki dzion znachodzicca pad nahladam milicyi, viaskoŭcy pahavorvajuć ab masavym źniščeńni chvorych śviniej, a miasa hetaha vytvorcy ŭžo druhi dzień adsutničaje na pryłaŭkach firmiennych mahazinaŭ. Aficyjnyja ž ułady śćviardžajuć, što na «Uschodnim» usio dobra!»
Kab pravieryć infarmacyju, žurnalisty haziety «Intex-press» adpravilisia na KPS «Uschodni».
Pra toje, što ŭ kompleksie pa vytvorčaści śvininy «Uschodni» ŭ vioscy Sieŭruki adbyvajecca niešta niadobraje, u redakcyju «IR» paviedamiŭ adzin z čytačoŭ.
«U subotu ačapili terytoryju, vystavili post DAI, nahnali techniki — na poli kala lesu vykapali tranšei, ustalavali słupy ź lampami i pačaŭsia Aśviencym! Padvoziać na traktarach parasiat, prosta ŭ pryčepach usporvać nažami im žyvaty, jašče žyvych kidajuć u jamu i zasypajuć vapnaj. Bolš bujnych zabivajuć siakierami i elektratokam. Visk staić žudasny!».
«Chto nam što skaža?»
Toje, što situacyja vakoł «Uschodniaha» nieadnaznačnaja, stała zrazumieła jašče na padjeździe. Za niekalki kiłamietraŭ da terytoryi kompleksu nas niečakana sustrakaje «błokpost» — zabaranialnyja znaki i pradstaŭnik DAI! Dalej jechać nielha. Naprava, dzie doŭhim šeraham vystrailisia asabistyja aŭtamabili rabotnikaŭ kompleksu (za niekalki kiłamietraŭ ad miesca pracy!) — taksama prajezdu niama.
«Dezinfiekcyja idzie», — koratka tłumačyć situacyju pastavy. Jakaja dezinfiekcyja? Čamu błokpost na takoj vialikaj adlehłaści ad kompleksu? Čamu navat pastaŭščyki čakajuć nakładnyja ŭ kiłamietry ad pradpryjemstva? «Mnie nie dakładvali, tut dezinfiekcyja», — niekalki razoŭ paŭtaraje pastavy i raić jechać, adkul pryjechali.
Značna bolš za supracoŭnika DAI pra pryčyny «błakady» pradpryjemstva čuli žychary bližejšych ad kompleksu viosak. U Cieplivodach žančyny achvotna raskazali žurnalistam, što na vychodnych da kompleksu ŭvieś čas «mašyny ź mihałkami padciahvalisia». Jany nie sumniavajucca — «ad čumki śvinki palehli».
«U śviniej znajšli niešta niadobraje, zabivajuć i zakopvajuć ich u poli», — tłumačać nam u Sieŭrukoŭskaj kramie. Pytajemsia, adkul takaja daśviedčanaść? «Tam ža milicyja, chutkaja, MNS cełymi dniami dziažurać.Ź ministerstva panajechali. Rabočyja kažuć, što epidemija, ich u niadzielu pracavać prymusili », — dzielacca miascovymi čutkami žančyny.
Na adnym z padvorkaŭ troje chłopcaŭ śviažieujuć paru tušaŭ śviniej. Spačatku jany admachvajucca ad karespandentaŭ, potym chłopiec, jaki kiravaŭ zabojem, nie strymlivajecca: «Ja z-za hetaha «Uschodniaha» bju svaich parasiat!» — Taki ahulny sens jaho słoŭ, kali prybrać niecenzurnyja słovy. Pa słovach inšych žycharoŭ, nijakich zahadaŭ z boku kiraŭnictva ab źniščeńni śviniej nie pastupała — chłopcy, mabyć, vyrašyli padstrachavacca na taki vypadak.
«Nie bojciesia, niama z Uschodniaha»
Na Baranavickim kaaprynku na pytańnie karespandentaŭ «Adkul śvinina?» pradaŭcy paśpiešliva adchryščvajucca — «nie bojciesia, nie z «Uschodniaha». Akazvajecca, my nie pieršyja zadajem hetaje pytańnie miaśnikam.
«Na «Uschodnim» zachvareli śvińni, niekalki tysiač hałoŭ pazabivali, niešta im tam u kambikorm nie toje pakłali. Voś ludzi i bajacca, što miasa chvoraje budzie. Ale my z Uschodniaha nikoli ničoha nie pradavali, tam doraha zakuplać śvininu», — tłumačać pradaŭcy miasa.
«U vas pradajuć miasa z KPS «Uschodni»? — pytajemsia my ŭ vieturačoŭ kaaprynku, jakija kantralujuć jakaść miasa. «A što na Uschodnim? Na Uschodnim usio dobra!» — niedarečy, byccam zahadzia padrychtavaŭšysia, adkazvaje pažyły lekar.
A voś heta jašče bolš cikava. Miasnaja pradukcyja KPS «Uschodni» — asnoŭny składnik asartymientu firmovaj kramy «Haspadar». U aŭtorak, 30 krasavika, na pryłaŭkach miasa hetaha vytvorcy adsutničaje. «My siońnia handlujem pradukcyjaj Biarozaŭskaha miasakambinata. Z «Uschodniaha» śvininy niama i nie pakul budzie », — kažuć pradavački. Čamu — nie tłumačycca.
«Na Uschodnim usio ŭ paradku!»
U toj čas, jak niekatoryja haradžanie surjozna zakłapočanyja jakaściu miasa, jakoje traplaje na baranavickija pryłaŭki, a toje, što adbyvajecca na kompleksie, vyklikaje naściarožanaść, aficyjnyja ŭłady adkazvajuć: «Na Uschodnim usio ŭ paradku!»
U pryjomnaj hałoŭnaha rajonnaha vieturača Mikałaja Pakumiejki, nie čakajučy pytańnia karespandenta sakratar daje spravazdaču: «Jon usio roŭna ničoha vam nie raskaža, na «Uschodnim» usio vydatna, usio ŭ paradku!»Pa mabilnym telefonie sam rajonny vieturač adkazaŭ tolki, što «ŭ dadzieny momant nie moža razmaŭlać» i bolš trubku asabistaha telefona nie zdymaŭ.
Zatoje načalnik haradździeła UKDB Hienadź Białkoŭ infarmacyju ab masavym mory śviniej u KPS «Uschodni» abvierh. «Na lubym padobnym pradpryjemstvie zdarajecca niaznačny mor žyvioły ŭ miežach normy.Niejkaha masavaha moru na «Uschodnim» nie było. Pradpryjemstva pracuje, ludzi atrymlivajuć zarpłatu», — rastłumačyŭ Hienadź Białkoŭ. Čamu ž u takim vypadku prajezdy da kompleksu achoŭvajuć? «Mabyć, pravodziacca niejkija sanitarnyja mierapryjemstvy», — rastłumačyŭ načalnik dziaržbiaśpieki. A voś pytańnie ab tym, ci mieła miesca masavaje źniščeńnie śviniej, jon nazvaŭ «pravakacyjnym» i zaviaršyŭ razmovu.
Hienieralny dyrektar AAT «Baranavičchlebapradukt», u skład jakoha ŭvachodzić KPS «Uschodni», Natalla Mańko taksama zapeŭnivaje, što nijakaj prablemy niama. «Ja mahu paručycca, što na pradpryjemstvie usio ŭ paradku. Va ŭsiakim vypadku, ničoha takoha mnie nie dakładvali», — raspaviała «IP» hiendyrektar.
Pra toje, što padjezdy da kompleksu vartuje milicyja, Natalla Mańko čuła, adnak nie maje paniaćcia, da čaho takaja achova. Ab źniknieńni z pryłaŭkaŭ firmiennych mahazinaŭ śvininy z KPS jana taksama viedaje, ale nie bačyć u hetym «ničoha strašnaha». «Ja budu ŭdakładniać infarmacyju, ale na siońnia mahu skazać, što ŭsio naša 80-tysiačnaje pahałoŭje śviniej ŭ paradku», — zapeŭniła «IP» Natalla Mańko.
