Klešč. Fota medical-enc.ru.
Klimat ciapleje — klaščoŭ boleje
Sioleta siezon aktyŭnaści klaščoŭ pačaŭsia na miesiac paźniej, ale ŭ Biełarusi ŭžo zarehistravana kala 20 ukusaŭ klaščoŭ. Najbolšuju aktyŭnaść nasiakomyja prajaŭlajuć u paŭdniovych rehijonach.
Takuju infarmacyju paviedamili śpiecyjalisty padčas pres-kanfierencyi «Klaščavyja infiekcyi ŭ Respublicy Biełaruś i zachady pa ich prafiłaktycy».
«U Biełarusi naličvajecca niekalki vidaŭ klaščoŭ, ale tolki dva pieranosiać niebiaśpiečnyja dla čałavieka zachvorvańni — encefalit i Łajm-barelioz.Nasamreč, u Biełarusi rehistrujecca našmat mienš vypadkaŭ zachvarełych paśla ŭkusaŭ klaščoŭ, čym u krainach Bałtyi, ZŠA, Aŭstryi, Šviejcaryi», — paviedamiŭ urač-epidemiołah DU «Respublikanski centr hihijeny, epidemiałohii i hramadskaha zdaroŭja» Andrej Viedziankoŭ.
Pavodle ekśpiertaŭ, letaś było zafiksavana 1 096 vypadkaŭ zachvorvanńniaŭ na Łajm-barelioz i 118 vypadkaŭ kleščavaha encefalitu. U paraŭnańni z 2011 hodam, zachvorvańnie ŭzrasło na 2,6% i 11,3% adpaviedna.
«Heta adbyłosia na fonie ahulnaha pryrostu papulacyi klaščoŭ na 37%. Pryčynaj tamu stała anamalna rańniaja viasna i poźni nadychod chałodnaha nadvorja.Sioleta praz poźniuju viasnu my čakajem spadu papulacyi klaščoŭ. U apošnija hady pieryjad aktyŭnaści klaščoŭ značna padoŭžyŭsia: kali raniej jon ciahnuŭsia z krasavika pa kastryčnik, zaraz jon pačynajecca ŭ sakaviku, a zakančvajecca ŭ listapadzie. Letaś asobnyja vypadki ŭkusaŭ klašča rehistravali navat u śniežni», — raskazała entamołah Respublikanskaha centra hihijeny, epidemijałohii i hramadskaha zdaroŭja Śviatłana Jaškava.
«Dobra apranajciesia i nie rabicie pryščepak»
Andrej Viedziankoŭ nahadaŭ, što z nadychodam siezonu aktyŭnaści klaščoŭ nieabchodna prymać adpaviednyja zachady dla panižeńnia ryzyki ŭkusaŭ
«Pa-pieršaje, treba ščylna adziavacca i pakidać jak maha mieniej učastkaŭ adkrytaj skury — klaščy nie kusajuć praz adzieńnie. Pa-druhoje, abaviazkova karystajciesia repielentami. Samy ž efiektyŭny zachad — samaahlad praz kožnyja dźvie-try hadziny», — nahadaŭ jon.
A voś pryščepki varta rabić tolki tym, chto letam źbirajecca ŭ Sibir i na Daloki Uschod. Takija pryščepki abaviazkova rabić supracoŭnikam, jakija siezon aktyŭnaści klaščoŭ vyjazdžajuć u hetyja rehijony — u paraŭnańni ź Biełaruśsiu klaščy tam pieranosiać ciažkija formy zachvorvańniaŭ.
«U Biełarusi sustrakajucca asobnyja vypadki letalnaha vyniku ad encefalitu i Łajm-bareliozu— kali chvaroba ŭskładniajecca inšymi ciažkimi zachvorvańniami pacyjenta. Na Dalokim Uschodzie śmiarotnaść ad hetych infiekcyj dasiahaje 15%, invalidyzacyja — 30%. U Biełarusi ž sustrakajucca tolki vostryja formy chvarobaŭ, jakija pieranosiacca klaščami i ŭsie jany dobra vylečvajucca, a zaražany kala 30% klaščoŭ. Tamu nie treba mocna nahružać svaju imunnuju sistemu kompleksam pryščepak suprać klaščavych infiekcyj», — paviedamiŭ Viedziankoŭ.
«Zdymicie klašča jak maha chutčej»
Kali vy ŭsio ž znajšli na sabie klašča, treba jak maha chutčej źniać jaho: heta značna pamienšyć ryzyku zaražeńnia, nahadali śpiecyjalisty. Źniać klašča možna z dapamohaj piatli sa zvyčajnaj nitki ci pincetam. Taksama možna źviarnucca ŭ bližejšy traŭmpunkt.
Adnak toje, što kožny pryniesieny ŭ balnicu klešč i kožny ŭkušany pacyjent budzie abśledavany — heta pamyłkovaja dumka.Namieśnik hałoŭnaha ŭrača infiekcyjnaj balnicy h. Minska Aleh Vielhin rastłumačyŭ «Našaj Nivie», čamu analizy naznačajuć nie kožnamu.
«Heta ekanamična niemetazhodna, a taksama patrabuje šmat času i čałaviečych resursaŭ. Rašenie ab nakiravańni klašča i kryvi pacyjenta na analiz prymaje ŭrač na asnovie dadzienych pra kolkaść zachvorvańniaŭ u miascovaści, dzie adbyŭsia ŭkus, časie znachodžańnia nasiakomych na pacyjencie.
Taki ałharytm byŭ vypracavany ŭ ZŠA, dzie aktyŭna daśledavali klaščavyja infiekcyi. Pry hetym analiz kryvi zajmaje praciahły čas, a čakańnie moža naadvarot naškodzić pacyjentu. Tamu zvyčajna pacyjentu pryznačajecca prafiłaktyka ŭ vyhladzie pryjomu dźviuch tabletak daksicyklinu. Nie padychodzić taki mietad tolki dla dziaciej da 7 hadoŭ, ciažarnym i kormiačym maci, a taksama ludziam z zachvorvańniam piečani», — skazaŭ Vielhin.
Śpiecyjalist taksama nahadaŭ pra pieršyja prajaŭleńni infiekcyj, jakija možna padčapić ad klašča.
«Pry Łajm-bareliozie ŭ 60% vypadkaŭ pieršy simptom — pačyrvanieńnie skury vakoł miesca ŭkusa. H.zn. čyrvonyja plamy, jakija ŭźnikajuć paśla ŭkusu. Encefalit ža prajaŭlajecca hrypapadobnymi simptomami.
Kali vas ukusiŭ klešč i vy zaŭvažyli niejkaje adchileńnie zdaroŭja ad normy — nieadkładna źviarniciesia da doktara», — papiaredziŭ jon.
A Śviatłana Jaškova nahadała, što taksama vielmi niebiaśpiečnym źjaŭlajecca niehatavanaje kazinaje małako ad maładych žyviołaŭ. Letaś praź jaho encefalitam zarazilisia 30 čałaviek.
