«Naftavaje zamireńnie» miž Rasiejaj i Biełaruśsiu padychodzić da kanca, — piša blizkaja da ŭradavych kołaŭ hazieta. — Niahledziačy na toje, što Alaksandr Łukašenka i premjer Respubliki Biełaruś Michaił Miaśnikovič nastojvajuć na pavieličeńni pastavak rasijskaj nafty na biełaruskija NPZ da 23 młn t, damahčysia hetaha budzie vielmi składana. Pieršy vice-premjer Biełarusi Uładzimir Siamaška niadaŭna navat zajaviŭ, što ŭ III kvartale hetaha hoda abjom pastavak skłaŭ 5,75 młn t, što ŭkładajecca ŭ vynikovuju kolkaść nafty, na jakuju raźličvaje respublika. Ale ŭrad Rasiei padrychtavaŭ užo list biełaruskamu boku pra niežadańnie ŭzhadniać pavieličeńnie pastavak nafty na biełaruskija NPZ u III i IV kvartałach 2013 hoda.
— Siarod pretenzij rasijskaha ŭrada — nievykanańnie biełarusami ŭmovaŭ pa viartańni ŭzhodnienaha abjomu naftapraduktaŭ, vyrablenych z rasijskaj nafty. Akramia hetaha, biełarusy zaciahvajuć realizacyju supolnych intehracyjnych prajektaŭ, u tym liku stvareńnie SP pamiž rasijskim vytvorcam hruzavikoŭ KamAZam i biełaruskim MAZam, — paviedamiła krynica va ŭradzie [Rasija dabivajecca kantrolu nad roznymi śfierami biełaruskaj ekanomiki — NN].
Biełaruś nastojvaje na nieabchodnaści zachavańnia bałansu pastavak rasijskaj nafty na biełaruskija NPZ na ŭzroŭni 23 młn t nafty ŭ 2013 hodzie. Pieramovy pra heta viaducca z vosieni minułaha hoda. Rasijski ž bok nie raz zajaŭlaŭ pra svaju hatoŭnaść nakiravać tolki 18,5 młn t nafty ŭ abmien na vyrablenyja ź jaje 2,1 młn t naftapraduktaŭ standartu «Jeŭra-3».
«Letaś Rasija złaviła Biełaruś na tym, što taja ekspartuje naftapradukty ŭ Jeŭropu pad vyhladam rastvaralnikaŭ, — miarkujuć «Iźviestija». — Hetyja tavary nie abkładajucca ekspartnaj pošlinaj pry vyvazie za miežy Mytnaha sajuza, tamu rasijski biudžet niedaatrymaŭ za ich paradku $ 1,5-2 młrd. Akramia hetaha, da vosieni minułaha hoda nie było i nijakich abiacanych zvarotnych pastavak naftapraduktaŭ. 300 tys. t naftapraduktaŭ udałosia viarnuć u IV kvartale tolki paśla taho, jak Rasieja skaraciła pastaŭki nafty ŭ Biełaruś».
«Niahledziačy na heta, u 2013 hodzie sajuznaja respublika [tak nazyvajuć Biełaruś «Iźviestija» — NN] dvojčy zdoleła damahčysia ad rasiejskaha ŭrada praciahu pastavak nafty ŭ raniejšym abjomie (5,75 młn t z hadavoha abjomu 23 młn t) na dva pieršyja kvartały. Jak paviedamiła «Iźviestijam» krynica va ŭradzie, niahledziačy na epizadyčnyja parušeńni ŭmovaŭ u zvarotnych pastaŭkach naftapraduktaŭ u Rasiju, naftapradukty ź Biełarusi ŭ RF u asnoŭnym pastaŭlalisia. Adnak abjom realizacyi naftapraduktaŭ byŭ nievysokim. Pad epizadyčnymi parušeńniami majucca na ŭvazie manipulacyi z cenami, prapanavanymi biełarusami na rasijskich biržavych tarhach: rasijskija kampanii nie kuplajuć prapanavanaj biełarusami pradukcyi, bo ŭ bolšaści vypadkaŭ cana prapanovy biełaruskaha boku akazvajecca vyšejšaj za canu zakryćcia papiaredniaha dnia», — pišuć «Iźviestija».
Kanflikt vakoł pastavak nafty i naftapraduktaŭ nie adziny momant, jaki paŭpłyvaŭ na rašeńnie Rasiei pastavić Biełarusi [čarhovy kitajski] «naftavy ultymatum". «Iźviestija» ŭprost pišuć, što «Biełaruś usialakimi šlachami imkniecca da zaciahvańnia pracesu realizacyi supolnych prajektaŭ, vysoŭvajučy novyja i źmianiajučy ŭmovy raniejšych damoŭlenaściaŭ».
Dalej «Iźviestija» ŭ łob pieraličvajuć pradpryjemstvy, na jakija Rasija choča nakłaści ruku.
«U pryvatnaści, heta datyčyć prajekta raźvićcia AAT «Hrodna Azot», kantrolny pakiet jakoha biełaruski dziaržaŭny kancern «Biełnaftachim» źbirajecca pradać rasijskaj kampanii.
Taksama krynica adznačyŭ słaboje prasoŭvańnie pracesu stvareńnia sumiesnaha aŭtamabilnaha chołdynhu «Raśbiełaŭta» na bazie rasijskaha AAT «KamAZ» i biełaruskaha AAT «MAZ». Baki jašče ŭ 2012 hodzie dasiahnuli damoŭlenaściej i sfarmulavali ich u Kancepcyi supracoŭnictva, adnak biełaruski bok vystaŭlaje ŭsio novyja patrabavańni. Naprykład, prapanuje zachavać asobna za MAZam markietynhava-zbytavuju strukturu, prava na praviadzieńnie daśledavańniaŭ i raspracovak pa stvareńni novaj techniki sa stvareńniem navukova-techničnaha centra z doślednaj vytvorčaściu ŭ Minsku, damahajecca abaviazkovaha vykarystańnia aŭtakampanientaŭ biełaruskaj vytvorčaści na ŭzroŭni nie mienš za 40%. Akramia hetaha, biełaruski bok choča mieć mahčymaść inviestavać u raźvićcio MAZa jak asobnaha haspadarčaha subjekta z prynaležnymi da jaho pradpryjemstvami paradku $ 1,2 młrd da 2020 hoda.
Hazieta ŭzhadvaje zajavu Alaksandra Łukašenki, zroblenuju ŭ časie zvarotu da nacyjanalnaha schodu 19 krasavika. Łukašenka zajaviŭ, što sumniavajecca ŭ metazhodnaści źlićcia MAZa i KamAZa, pakazaŭšy na toje, što heta mahčyma tolki na vyhadnych umovach.
— Prychodziać ludzi, ja ŭ ich pytajusia: što my atrymajem ad hetaha abjadnańnia, akcyjanavańnia, a jašče — pieradaj akcyi za biascenak? Mianie pačynajuć infarmavać, što za imi [KamAZam] stajać zamiežniki, jany źjaŭlajucca tam akcyjanierami i jany buduć zacikaŭleny, kab MAZ apuścić, začynić. Im nie treba lišnich kankurentaŭ. Ja — prezident Biełarusi, i ja na hetuju bandyckuju akcyju, inakš nie nazavieš, nie pajdu», — skazaŭ Łukašenka.
Dalej «Iźviestija» pišuć: «Pradstaŭnica rasijskaha vice-premjera Arkadzia Dvarkoviča Alija Samihulina skazała, što pytańnie naftavych bałansaŭ na III i IV kvartały pakul rana abmiarkoŭvać i kankretnyja rašeńni z hetaj nahody buduć bližej da červienia. Što da intehracyjnych prajektaŭ, to hetaje pytańnie razhladałasia padčas pieramovaŭ Arkadzia Dvarkoviča i pieršaha namieśnika premjer-ministra Biełarusi Uładzimira Siamaški i najbolšyja sprečki vyklikaje SP KamAZa i MAZa.
Akramia hetaha, roznahałośsi jość i pa prajekcie intehracyi Minskaha zavoda kołavych ciahačoŭ u strukturu rasijskaha abaronna-pramysłovaha kompleksu (APK). Rasijski bok nastojvaje na haryzantalnaj intehracyi z pradpryjemstvami APK, takimi jak KamAZ i «Urałvahonzavod». Minsk, u svaju čarhu, prapanuje prajekt viertykalnaj intehracyi i pašyreńnia supracoŭnictva z rasijskimi pradpryjemstvami, takimi jak «Karparacyja», Maskoŭski instytut ciepłatechniki, «Kancern SPA «Ałmaz-Antej», NVA «Spłaŭ» i NPK «Kanstruktarskaje biuro mašynabudavańnia», — zaklučajuć «Iźviestija».
Rasija nie pieršy raz pahražaje skaračeńniem pastavak nafty ŭ Biełaruś. Pastaŭki nafty j hazu na lhotnych umovach zabiaśpiečvajuć stabilnaść aŭtarytarnaha režymu ŭ Biełarusi. Viedajučy heta, Maskva ŭpeŭnienaja, što pastupova dabjecca svaich biznes-metaŭ u Biełarusi.
