U Złučanych Štatach nadychodzić čas refleksii. Kim byli braty Carnajevy, što padšturchnuła ich da ździajśnieńnia teraktu, dzie dapuścili pamyłku pravaachoŭnyja orhany, a dzie, naadvarot, spracavali prafesijna, ci nie pryviadzie novy terakt da dalejšaha abmiežavańnia hramadzianskich svabod albo, naprykład, pierahladu planaŭ imihracyjnaj reformy abo ŭzmacnieńnia žorstkaści kantrolu nad zbrojaj — usie hetyja pytańni ŭžo abmiarkoŭvajucca.
Adna ź pieršych sprobaŭ analizu asoby i matyvaŭ Tamerlana i Džachara Carnajevych źmiaščajecca ŭ artykule Dejvida Remnika na sajcie časopisu The New Yorker. Pačynajecca jana z napaminu ab tym, jak «u razhar Druhoj suśvietnaj vajny Iosif Stalin abviaściŭ čačenski narod voraham SSSR i vyhnaŭ jaho ź jahonaj radzimy». Siarod departavanych była i siamja Carnajevych, jakaja pasialiłasia ŭ Kirhizii.
Remnik koratka raspaviadaje pra historyju vojnaŭ u Čačni i teraktaŭ i adznačaje, što siamja Carnajevych pierasialiłasia ŭ Złučanyja Štaty bolš za 10 hadoŭ tamu i dzieci — zabity ciapier Tamerlan i aryštavany Džachar — pa sutnaści, vyraśli i sfarmavalisia ŭ Amerycy. Pry hetym małodšy brat Džachar, miarkujučy pa ŭsim, značna bolš paśpiachova adaptavaŭsia da amerykanskaha hramadztva. Remnik pryvodzić šmatlikija śviedčańni znajomych i susiedziaŭ bratoŭ, ich tavaryšaŭ pa škole i, narešcie, uryŭki ź ich zapisaŭ u sacyjalnych sietkach — «žartach, kryŭdach, zababonach, viery, marach». Jon piša pra trahiedyju baćkoŭ bratoŭ (jany niekalki hadoŭ tamu viarnulisia ŭ Dahestan, Anzor Carnajeŭ skazaŭ u interviju «Svabodzie», što ličyć svaich dziaciej achviarami zmovy).
U historyi siamji Carnajevych, — zaklučaje aŭtar The New Yorker, — adbiłasia i trahiedyja departacyi, i toje, što «era ličbavych technalohij nia moža dać ratunku ad ekstremizmu», i, narešcie, toj fakt, što «amerykanskaja mara» padmanlivaja i spraŭdžvajecca zusim nie dla ŭsich, chto pryjaždžaje ŭ krainu z nadziejami na lepšaje žyćcio.
