Pradstaŭniki palityčnych partyj, arhanizacyj, niaŭradavych arhanizacyj i ruchaŭ, jakija sabralisia 19 krasavika ŭ ofisie Partyi BNF dla abmierkavańnia najbolš vostrych dla Biełarusi ekałahičnych prablem, abjavili ab stvareńni Biełaruskaha ekałahičnaha kamiteta. Sustreča prajšła ŭ ramkach pieršaha kruhłaha stała «Čarnobyl. Astraviec. Evalucyja katastrofy», arhanizavanaha arhkamitetam «Čarnobylskaha šlachu — 2013».

Palityki i hramadskija dziejačy abmierkavali razam z ekołahami i ekśpiertami ekałahičnyja prahramy i pazicyju svaich partyj. Najbolš vostrym dla Biełarusi, na dumku prysutnych, źjaŭlajecca pytańnie źmiakčeńnia nastupstvaŭ avaryi na ČAES i budaŭnictva Astravieckaj AES, jakoje ažyćciaŭlajecca z parušeńniami zakanadaŭstva, budaŭničych norm i biez prajektnaj dakumientacyi. Pradstaŭniki demsił i ekołahi zhadali taksama pra raźmiaščeńnie ŭ krainie ekałahična niebiaśpiečnych vytvorčaściaŭ, źniščeńnie zialonych zon, raspracoŭku tarfianikaŭ na asabliva achoŭvajemych terytoryjach i mnohija inšyja. Asobna ŭdzielniki adznačyli paŭsiamiesnaje parušeńnie zakanadaŭstva i źmiakčeńnie ekałahičnych zakonaŭ.

Biełaruski ekałahičny kamitet zadumany nie jak arhanizacyja, a jak adkrytaja placoŭka, jakaja dziejničaje pastajanna,
dzie pradstaŭniki palityčnych partyj, hramadskich arhanizacyj, miascovych inicyjatyŭ, ekołahi i ekśpierty zmohuć abmiarkoŭvać naśpiełyja ekałahičnyja prablemy i znachodzić šlachi ich vyrašeńnia.

«Naša zadača — ekałahičnaje adradžeńnie Biełarusi, i heta pavinna stać nacyjanalnaj idejaj biełarusaŭ», — zajaviŭ pradstaŭnik «Jeŭrapiejskaj Biełarusi», adzin ź inicyjataraŭ stvareńnia ekałahičnaha kamiteta Viktar Ivaškievič.

Na dumku sustaršyni arhkamiteta pa stvareńni partyi «Biełaruskaja chryścijanskaja demakratyja» Vitala Rymašeŭskaha, u ekałahičnaha kamiteta pavinna być stratehija, prahrama dziejańniaŭ dla źmianieńnia ekałahičnaj situacyi ŭ bližejšaj i doŭhaterminovaj pierśpiektyvie.

«Ekałahičny kamitet dazvolić dziejničać razam, i heta pavialičyć našy šancy dabicca vyrašeńnia tych ci inšych vostrych pytańniaŭ. Aprača taho, placoŭka daść mahčymaść atrymlivać usim jaje ŭdzielnikam svoječasovuju infarmacyju ab ekałahičnych prablemach i sposabach ich vyrašeńnia», — miarkuje hramadski ekołah, kaardynatar Biełaruskaj antyjadziernaj kampanii Taćciana Novikava.

U kamitet uvajšli pradstaŭniki «Jeŭrapiejskaj Biełarusi», «Biełaruskaha ruchu», Biełaruskaj antyjadziernaj kampanii, Biełaruskaj partyi levych «Spraviadlivy śviet», BSDP «Hramada», kampanij «Havary praŭdu!», «Za spraviadlivyja vybary!», AHP i Partyi BNF. Inicyjatary čakajuć, što z pracy kamiteta voźmuć udzieł rehijanalnyja ekołahi.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?