18 krasavika Ašmianski rajonny sud pryniaŭ rašeńnie pa spravie alboma «Pres-fota Biełarusi — 2011». Jon pryznaŭ fotaalbom Belarus Press Photo 2011 ekstremisckim. Pavodle zakona, 41 asobnik vydańnia mohuć źniščyć.
Razhlad spravy inicyjavała ŭpraŭleńnie KDB pa Hrodzienskaj vobłaści, jakoje patrabavała pryznać ekstremisckimi fotazdymki, źmieščanyja ŭ albomie.
41 asobnik alboma «Pres-fota Biełarusi — 2011» byŭ kanfiskavany ŭ fatohrafaŭ Julii Daraškievič i Alaksandra Vasiukoviča 2 listapada 2012 hoda na pamiežnym pierachodzie «Kamienny Łoh». Daraškievič, Vasiukovič, a taksama adzin z arhanizataraŭ konkursu Vadzim Zamiroŭski byli ŭ sudzie ŭ jakaści «zacikaŭlenych asob».
Zamiroŭski ŭ sudzie zaznačyŭ: «Chaču padkreślić, što materyjały alboma — nie našyja vydumki, a vynik pracy mižnarodnaha žury — bolš kvalifikavanaha, čym ekśpiertnaja kamisija, jakaja aceńvała albom. Chaču adznačyć, što aŭtaram fota, pavodle ŭmovaŭ konkursu, zabaraniałasia ŭmiešvacca ŭ padziei, rabić pastanovačnyja zdymki». Jahonyja kalehi prytrymlivajucca padobnaha mierkavańnia.
Što čakaje apalny albom, arhanizataraŭ konkursu i ŭładalnikaŭ vydańnia.
Tłumačyć namieśnik staršyni Biełaruskaj asacyjacyi žurnalistaŭ Andrej Bastuniec: «Taki vynik suda, uvohule sam praces — heta vielmi surjoznaje abmiežavańnie svabody vykazvańnia. Takoje rašeńnie parušaje Kanstytucyju krainy, a taksama mižnarodnyja pahadnieńni ŭ śfiery svabody słova, padpisanyja Biełaruśsiu».
Pakul što prysud nie ŭstupiŭ u zakonnuju siłu. U arhanizataraŭ konkursu jość dziesiać dzion na kasacyjnuju skarhu ŭ Hrodzienskim abłasnym sudzie. Paśla ŭstupleńnia prysudu ŭ siłu buduć mahčymyja pradpisanyja sudom dziejańni, to bok źniščeńnie 41 asobnika vydańnia.
Pakul nie zrazumieła, jaki los čakaje asobniki alboma «Pres-fota Biełarusi — 2011», jakija znachodziacca na realizacyi ŭ kniharniach.
Što datyčyć arhanizataraŭ konkursu, to niekatoryja ź ich prysutničali ŭ sudzie ŭ jakaści zacikaŭlenych asob. Kryminalnaj i administracyjnaj adkaznaści jany nie niasuć. Jak i ŭładalniki alboma.Trymać jaho va ŭłasnaj kalekcyi zakon dazvalaje, administracyjnaja adkaznaść niasuć tyja ŭładalniki vydańnia, što zachoŭvajuć jaho z metaj raspaŭsiudu.
***
Kiraŭnictva HA «Biełaruskaja asacyjacyja žurnalistaŭ» źviarnułasia da hramadskaści z admysłovaj zajavaj.
HA «Biełaruskaja asacyjacyja žurnalistaŭ» vykazvaje niazhodu z rašeńniem suda Ašmianskaha rajona ab pryznańni fataalboma «Pres-fota Biełarusi 2011» ekstremisckimi materyjałami. Jak my ŭžo adznačali, sam fakt razhladu hetaj spravy ŭ sudzie vyhladaŭ absurdna, i mienavita jon, a nie źmiest alboma, zdolny «padarvać davier da orhanaŭ ułady».
Spadziajemsia, što dadzienaje sudovaje rašeńnie ŭ zakonnuju siłu nie ŭstupić, i Respublika Biełaruś nie apyniecca ŭ «čornym śpisie» dziaržavaŭ, dzie zabaraniajuć i źniščajuć mastackija knihi. Razam z tym my ŭpeŭnienyja, što biełaruskija žurnalisty i nadalej buduć vykonvać svaje prafiesijnyja abaviazki, nie zvažajučy na žadańnie ideałahičnaj viertykali pradstaŭlać biełaruskuju rečaisnaść vyklučna ŭ «ružovych kolerach».
Upeŭnienyja, što biełaruskaja presavaja fatahrafija ŭsio roŭna budzie zastavacca pierakanaŭčym fotadakumientam pra žyćcio biełaruskaha hramadstva.
