Stvaryŭšy ŭ 2005 hodzie sumiesny trejdar — Biełaruskuju kalijnuju kampaniju (BKK), «Urałkalij» i «Biełaruśkalij» atrymali status hłabalnych manapalistaŭ z 41-pracentnaj dolaj na suśvietnym rynku kalijnych uhnajeńniaŭ.
Ale ź niadaŭnich časoŭ handal praź Biełaruś staŭ hniaści kampanii i jany zadumalisia ab stvareńni novaha sumiesnaha trejdara, ale ŭžo ŭ Šviejcaryi, piša RBK-Daily. Ale, jak akazałasia, «Urałkalij» navat apiaredziŭ źmienu handlovych patokaŭ: užo ŭ minułym hodzie try čverci svajho ekspartu kampanija praviała praz ŭłasnaha trejdara — šviejcarskuju Uralkali Trading.
U 2005 hodzie tahačasny ŭładalnik «Urałkalija» Dźmitryj Rybałoŭleŭ zdoleŭ pierakanać kiraŭnika Biełarusi Alaksandra Łukašenku abjadnać zbyt dvuch kalijnych kampanij praź Biełaruskuju kalijnuju kampaniju.
Ideja apynułasia efiektyŭnaj — kartel nieadnarazova dakazvaŭ, što ŭmieje naviazvać svaje ŭmovy navat takim bujnym imparcioram, jak Kitaj i Indyja.

U 2012 hodzie «Urałkalij» adpraviŭ na ekspart 77,8% vyrablenaj pradukcyi (7.280.000 t chłorkaliju suprać 2,08 młn. t unutryrasijskaha spažyvańnia). I choć kampanija pracuje na źniešnich rynkach praz BKK (u joj 50% naležyć «Urałkaliju», 45% — «Biełaruśkaliju» i 5% — «Biełaruskaj čyhuncy»), častka ekspartu jana ažyćciaŭlaje praz 100-pracentnuju šviejcarskuju «dačku» Uralkali Trading (UKT).

Pry hetym, jak vynikaje ź inviestpraśpiekta «Urałkalija», u 2012 hodzie adbyłosia značnaje pieraraźmierkavańnie abjomaŭ pamiž BKK i UKT. Pastaŭki praz BKK skaracilisia na 36% u paraŭnańni z 2011 hodam, da 1600000 t.
Heta mienš za 22% ekspartnych prodažaŭ «Urałkalija». Tyja, što zastalisia 78% ekspartavalisia praz UKT (amal 5.700.000 t). U 2011 hodzie na jaje i trejdaraŭ «Silvinita» sumarna davodziłasia 4550000 t.

Kampanija imkniecca hnutka pieraraźmiarkoŭvać abjomy pamiž BKK i UKT u zaležnaści ad umoŭ rynku, popytu z boku spažyŭcoŭ i łahistyčnaj metazhodnaści, tłumačyć «Urałkalij» u svaim praśpiekcie kaštoŭnych papier. Adnak, čamu raźmierkavańnie ŭ 2012 hodzie było mienavita takim, u kampanii nie patłumačyli.

Adnoj z pryčyn moža być toje, što na UKT zaviazanyja mnohija kredytnyja abaviazalnictvy «Urałkalija». Naprykład, u 2011 hodzie «Urałkalij» uziaŭ kredyt na $300 młn. u puła bankaŭ na čale z Societe Generale i Rasbankam pad harantyju UKT.

Akramia taho «Urałkalij» nahadvaje, što suprać šerahu vyšejšych asob biełaruskaha ŭrada, a taksama prezidenta krainy Alaksandra Łukašenki praciahvajuć dziejničać sankcyi z boku ZŠA.
Amierykanskaja administracyja, paličyŭšy vybary ŭ Biełarusi 2006 niedastatkova demakratyčnymi, zamaroziła aktyvy biełaruskich čynoŭnikaŭ, a taksama błakavała amierykanskija rachunki naftachimičnaha kancerna «Biełnaftachim». Paźniej sankcyi byli raspaŭsiudžanyja na daččynyja pradpryjemstvy «Biełnaftachima». Paśla vybaraŭ 2010-ha vizavyja sankcyi suprać biełaruskich čynoŭnikaŭ na čale z Łukašenkam uvioŭ Jeŭrasajuz. Dziejnaść BKK heta nijak nie zakranuła, ale «Biełaruśkalij» uvachodzić u kancern «Biełnaftachim», i jak zamiežnyja ŭłady rasceniać uzajemaadnosiny BKK, «Biełaruśkalija» i «Biełnaftachima», «Urałkalij» nie biarecca pradkazać. Zaraz usie pastaŭki «Urałkalija» ŭ Jeŭropu i ZŠA iduć praz UKT.
«Urałkalij» taksama pryznajecca ŭ svaich dakumientach, što, nie majučy kantrolu ŭ BKK, nie moža ŭ dastatkovaj miery ŭpłyvać na dziejańni mieniedžmientu trejdara, u pryvatnaści, rasijskaja kampanija nie moža nakłaści vieta na rašeńni hiendyrektara BKK.
A hiendyrektar SP naminujecca «Biełaruśkalijem» i nie moža być pryznačany abo źniaty z pasady biez adabreńnia asabista Alaksandra Łukašenki.
Narešcie, UKT zarehistravanaja ŭ Šviejcaryi, jaje «dačka» — Uralkali Trading (Gibraltar) Limited — u Hibrałtary. Abiedźvie struktury karystajucca značnymi padatkovymi pasłableńniami ŭ svaich jurysdykcyjach u adroźnieńnie ad BKK, jakaja płacić padatki ŭ biełaruski biudžet.
Praŭda, «Urałkalij» i «Biełaruśkalij» viaduć pieramovy ab stvareńni novaj trejdynhavaj struktury — «Sajuzkalija» (Soyuzkali), jakaja taksama budzie zarehistravanaja ŭ Šviejcaryi. Čakajecca, što jana pačnie funkcyjanavać u druhim paŭhodździ 2013 hoda i stanie kansalidavanym kanałam zbytu dla «Biełaruśkalija» i «Urałkalija».
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?