18 krasavika prachodziła apaznańnie mužčyny, jakoha padazrajuć u vystaŭleńni pałavych orhanaŭ pierad školnicami. Padrabiaznaści «Našaj Nivie» raskazaŭ baćka adnoj ź dziaŭčatak.
«Byli ja i dźvie mamy inšych dziaŭčatak. Jany nastajali, kab apaznańnie prachodziła jak u filmach pra FBR — za škłom. Usio adbyvałasia ŭ Śledčym kamitecie».
Pa jahonych słovach, ź imi prysutničali śledčy, sacyjalny piedahoh, paniatyja. Usie try dziaŭčatki pakazali na adnaho i taho ž mužčynu.
«Jon žychar Minska. Jak ja zrazumieŭ, u śledčych niama na jaho admoŭnych źviestak — nie pryciahvaŭsia da adkaznaci. Pa tvary — niaščasny: nie skažaš, što pjanica albo bandyt».
Jak stała viadoma, jašče ŭ subotu, 6 krasavika, zatrymany vystaviŭ svaje połavyja orhany pierad dziaŭčynkaj kala handlovaha centra «Ryha». A ŭ sieradu ŭžo, 10 krasavika, — paŭtaryŭ. I znoŭ trapiŭ na tuju ž školnicu ŭ kole siabrovak. Dziaŭčynka, jakaja dvojčy stała śviedkam hetaha, pajšła za złamyśnikam i źniała jaho na kamieru mabilnika. Jakaść atrymałasia drennaja, ale heta dapamahło zatrymać minčuka.
Baćka dziaŭčynki raskazaŭ, što dačka adrazu była ŭzrušanaja — nie chacieła zasynać u pieršuju noč.
«A ciapier ničoha. I hanarycca navat, što dapamahła abiasškodzić bandyta».
Jon adznačyŭ pracu sacyjalnych piedahohaŭ i kłasnaha kiraŭnika: adsočvajuć situacyju, u SK adrazu pryjechali.
Raniej paviedamlałasia, što zatrymaŭ 57-hadovaha ekshibicyjanista 16 krasavika apierupaŭnavažany adździeła kryminalnaha vyšuku Savieckaha RUUS Dźmitryj Kačan. Na prypynku hramadskaha transpartu jon źviarnuŭ uvahu na mužčynu, pa prykmietach vielmi padobnaha da šukanaha. Kali Dźmitryj padyšoŭ da jaho i pradstaviŭsia, toj prykmietna zaniervavaŭsia. Dla vyśviatleńnia asoby padazravany byŭ zaprošany ŭ adździeł milicyi, dzie i raskazaŭ usio.
