Supracoŭniki adździeła kryminalnaha vyšuku Pinskaha HAUS 6 krasavika ŭstanavili asobu maci, jakaja pakinuła svajo novanarodžanaje dzicia na leśvičnaj placoŭcy žyłoha doma ŭ Pinsku.
Nahadajem, 3 krasavika ŭ 14.20 u apieratyŭna-dziažurnuju słužbu haradskoha adździeła ŭnutranych spraŭ pastupiła paviedamleńnie ad žančyny pa vulicy Novikava. Jana skazała, što ŭ kvateru pazvaniŭ nieviadomy, a kali jana adčyniła dźviery, ubačyła na leśvičnaj placoŭcy zahornutuju ŭ pled novanarodžanuju dziaŭčynku, jakaja płakała.
Žančyna zabrała dzicia ŭ dom i pazvaniła ŭ milicyju. Na vyklik prybyli śledča-apieratyŭnaja hrupa Pinskaha HAUS i bryhada chutkaj dapamohi.
Miedyki ahledzieli dziaŭčynku. Z ahulnym pieraachaładžeńniem jana była źmieščana ŭ pinskuju dziciačuju balnicu.
Jak paviedamiŭ staršy inśpiektar hrupy infarmacyi i hramadskich suviaziaŭ Pinskaha haradskoha adździeła ŭnutranych spraŭ Juryj Kucevič,
maci padkidyša akazałasia niepracujučaja pinčanka 1986 hoda naradžeńnia. Inšaja infarmacyja pra jaje pakul nie paviedamlajecca.
Pavodle słoŭ Kuceviča, žančyna nie moža rastłumačyć pryčynu svajho ŭčynku. Ź jaje słoŭ, jana pryniesła niemaŭla mienavita da hetaj kvatery, tamu što mierkavała, što ŭ joj žyvie kormiačaja maci.
Pryznačany miedycynskija ekśpiertyzy. Pavodle papiarednich źviestak, žančyna znachodziłasia ŭ paślarodavym šoku. Pa vynikach pravierki budzie dadziena pravavaja acenka jaje dziejańniam.
Pavodle infarmacyi namieśnika hałoŭnaha ŭrača pinskaj dziciačaj balnicy Aleksandra Sačkoŭskaha, na siońnia dziaŭčynka znachodzicca ŭ adździaleńni danošanych dziaciej. U jaje fizijałahičnaja žaŭtucha i jana atrymlivaje nieabchodnaje lačeńnie. Pahrozy žyćciu dziaŭčynki niama.
Jak zaznačyŭ miedyk, novanarodžanaj na momant pastupleńnia ŭ balnicu było ŭsiaho kala sutak, vaha — 2 kh 615 h.
