Mižnarodny valutny fond zaniepakojeny tym, što biełaruskija ŭłady staviać pierad ekanomikaj supiarečlivyja mety, zajaviŭ 25 sakavika na bryfinhu ŭ Minsku kiraŭnik misii MVF u Biełarusi Devid Chofman.

U pryvatnaści, fond ukazvaje na płany ŭrada pa metavym pakazčyku ekanamičnaha rostu na ŭzroŭni 8,5% pry ŭtrymańni inflacyi ŭ miežach 12%. «Dla vykanańnia pakazčykaŭ rostu VUP nieabchodna asłableńnie mier ekanamičnaj palityki, što moža pastavić pad pahrozu metavy pakazčyk inflacyi i stvaryć nacisk na abmienny kurs», — skazaŭ Chofman.

Jak miarkuje misija, što pracavała ŭ Minsku z 14 pa 25 sakavika, uładam varta paźbiahać paŭtoru schiemy čarhavańnia mier, jakija stymulujuć i strymlivajuć, što prymianiałasia ŭ 2012 hodzie, i pravodzić pradkazalnuju, paśladoŭnuju makraekanamičnuju palityku, jakaja zabiaśpiečyć stabilnaść.

U hetych umovach misija ŭchvalaje ŭstanoŭleny ŭradam na 2013 hod metavy pakazčyk zbałansavanaha biudžetu, adnak dla zabieśpiačeńnia naležnaha kursu biudžetna-padatkovaj palityki patrabujucca dadatkovyja zachady.
Uradu sioleta varta imknucca da dalejšaha rezkaha skaračeńnia metavaha i subsidavanaha kredytavańnia. Jak zaznačyŭ Chofman, abmiežavańnie rostu zarpłaty taksama maje klučavoje značeńnie dla sadziejańnia strymlivańniu popytu i adnaŭleńnia kankurentazdolnaści. Jon źviarnuŭ uvahu na toje, što letaś u vyniku istotnaha pavyšeńnia zarpłaty «była stračanaja značnaja častka pavyšeńnia kankurentazdolnaści, atrymanaj u vyniku devalvacyi 2011 hoda».

Misija rekamienduje abmiežavać rost zarpłat u 2013 hodzie 12%, što adpaviadaje metavamu pakazčyku inflacyi.

U śfiery hrašova-kredytnaj palityki MVF rekamienduje Nacbanku być hatovym pavyšać pracentnyja staŭki, kali skaračeńnie inflacyi ŭ lutym nie budzie zamacavanaje ŭ nastupnyja niekalki miesiacaŭ.
«Pavyšeńnie pracentnych stavak taksama budzie nieabchodna, kali palityka metavaha kredytavańnia ci zarpłaty budzie skarektavanaja ŭ niedastatkovaj stupieni ci kali adnovicca nacisk na abmienny kurs», — zajaviŭ kiraŭnik misii.

MVF padkreślivaje, što dla dasiahnieńnia bolš vysokaha ŭstojlivaha rostu klučavoje značeńnie pa-raniejšamu majuć hłybokija strukturnyja reformy. «Urad dasiahnuŭ pośpiechu ŭ niekatorych halinach reform, uklučajučy padatkovuju sistemu i raspracoŭku novaha zakona ab bankructvie, adnak heta było nivielavana krokami nazad u inšych śfierach, takich jak libieralizacyja cen i pryvatyzacyja. Tamu nieabchodnaja ŭsioabdymnaja, maštabnaja prahrama reform», — padkreśliŭ Chofman.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?