Na fotazdymkach, raźmieščanych na niekatorych iranskich navinavych sajtach i šyroka raspaŭsiudžanych u sacyjalnych sietkach, bačna, jak Fryjas abapirajecca na Achmadziniežada, jak jany trymajucca za ruki i jana płača.
Miž tym, zhodna ź isłamskim kanonam, mužčyna i žančyna, jakija nie źjaŭlajucca svajakami, nie pavinnyja dakranacca adno da adnaho. Iranskija čynoŭniki i dypłamaty abmiažoŭvajucca pakłonami, zamiest taho kab paciskać ruku zamiežnym kaleham žanočaha połu.
Niekatoryja kansiervatyŭnyja palityki krytykujuć Achmadziniežada, kažučy, što ŭ Karakasie jon parušyŭ normy isłamu.
Deputat parłamienta Machmud Purfatemi skazaŭ, što duchoŭnaje kiraŭnictva krainy musić asudzić prezidenta i zabaranić jamu rabić lubyja «antyisłamskija» kroki. Inšy deputat vykazaŭ mierkavańnie, što pavodziny «najvyšejšaj słužbovaj asoby vykanaŭčaj ułady» nie byli hodnymi.
Achmadziniežad publična nie adreahavaŭ na krytyku jaho pavodzinaŭ padčas pachavańnia.
Deputat Muchamied Murtajedzini, jaki jeździŭ u Karakas z Achmadziniežadam, admaŭlaje, što prezident abniaŭ maci Čavesa. Pavodle deputata, hety fotazdymak niapravilna interpretujecca, i abdymkaŭ nie było. Achmadziniežad, skazaŭ Murtajedzini, prosta nie chacieŭ pakryŭdzić pačućci maci Čavesa, jakaja nazvała iranskaha prezidenta «synam».
Miž tym, asudžeńnie pavodzinaŭ i zajavaŭ Achmadziniežada praciahvajecca.
U paviedamleńni, apublikavanym na jahonym sajcie na minułym tydni, Achmadziniežad zajaviŭ, što jon byŭ upeŭnieny, što Čavies vierniecca ŭ śviet žyvych razam ź Isusam Chrystom i imamam Machdzi, jaki, pavodle šyickaj relihijnaj daktryny, syšoŭ u padpolle, ale adnojčy źjavicca, kab prynieści spraviadlivaść u śviet.
9 sakavika ajatała Muchamied Jaździ, čalec Asamblei relihijnych ekśpiertaŭ, paraiŭ Achmadziniežadu ŭstrymacca ad kamientaroŭ pa relihijnych pytańniach.
Apošni raund krytyki Achmadziniežada adbyvajecca na fonie baraćby za ŭładu pamiž prezidentam i jaho mahutnymi kansiervatyŭnymi apanientami na čale z duchoŭnym lidaram Irana, ajatałoj Ali Chamienei.
Druhi, apošni prezidencki termin Achmadziniežada zakančvajecca ŭ žniŭni sioleta.
