Łatuška sustreŭsia z Napaleonam 8

U pasolstvie Biełarusi ŭ Paryžy 5 sakavika adbyłasia sustreča pasła Paŭła Łatuški z prezidentam Jeŭrapiejskaj fiederacyi haradoŭ historyi Napaleona Šarlem Napaleonam.

Jak paviedamlaje dypmisija, Šarl Napaleon na pačatku sustrečy padziakvaŭ za mahčymaść naviedać Biełaruś u listapadzie minułaha hoda i pryniać udzieł u pamiatnych mierapryjemstvach 200-hodździa bitvy kala Biareziny.

Prezident Jeŭrapiejskaj fiederacyi haradoŭ historyi Napoleona prainfarmavaŭ ab dziejnasci fiederacyi, jakaja była stvorana ŭ 2004 hodzie, adznačyŭšy, što ŭ skład fiederacyi ŭvachodzić kala 50 haradoŭ Bielhii, Hiermanii, Italii, Polščy, Rasii, Čechii i inšych jeŭrapiejskich krain, jakija histaryčna źviazany ź dziejnaściu Napaleona Banaparta.

Hałoŭnymi metami fiederacyi ź`iaŭlajecca ab`iadnańnie i razvićcio supracoŭnictva pamiž haradami — udzielnikami fiederacyi, razvićcio turystyčnych kantaktaŭ, arhanizacyja sumiesnych kulturnych prajektaŭ, padtrymka supracoŭnictva navukoŭcaŭ-historykaŭ, navučalnych ustanoŭ i moładzi.

Šarl Napaleon adznačyŭ važnaść dla fiederacyi dałučeńnia Biełarusi da zhadanaha ab`iadnańnia jeŭrapiejskich haradoŭ i ad imia fiederacyi zaprasiŭ horad Barysaŭ uvajsci ŭ skład fiederacyi. Pasoł Biełarusi adznačyŭ važnaść razvićcia turystyčnaha supracoŭnictva pamiž Biełaruśsiu i Francyjaj, a taksama inšymi jeŭrapiejskimi krainami pry padtrymcy fiederacyi, vykazaŭ namier infarmavać kiraŭnictva Barysava ab hetaj prapanovie.

Padčas sustrečy taksama byli abmierkavany sumiesnyja kulturnyja prajekty pry ŭdziele biełaruskich muziejaŭ i fiederacyi.

Łatuška zaprasiŭ Napaleona naviedać mižnarodnuju turystyčnuju vystavu «Turbiznes-2013», jakaja projdzie ŭ Minsku, a taksama praviesci pieramovy z kiraŭnictvam Barysava i Nacyjanalnaha histaryčnaha muzieja Biełarusi.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH