Kamisar ES u pytańniach enierhietyki Hiunter Etynher čakaje, što reviersnyja pastaŭki hazu va Ukrainu praz terytoryju Słavakii buduć raspačatyja nastupnaj zimoj.
«Ja čakaju, što nastupnaj zimoj kalidor reviersnaha tranzitu hazu praz Słavakiju budzie adkryty», - skazaŭ jon. Pry hetym Hiunter Etynher pryznaŭ, što Słavakija błakavała revers hazu va Ukrainu, majučy techničnuju mahčymaść dla jaho pierapampoŭki.
«Siońnia ŭ vas užo jość mahčymaść reviersu - praz Polšču, Vienhryju. My pracujem nad pavieličeńniem kolkaści šlachoŭ, jakija dazvolać vam atrymlivać haz z LNG-terminałaŭ u Mižziemnym mory, Hałandyi.Sapraŭdy, była prablema z tym, što ŭrad u Bracisłavie nie dazvoliŭ reviers. Ale heta adzinkavy vypadak», - skazaŭ jeŭrakamisar. Taksama H.Etynher dadaŭ, što jon kantaktuje z uradam Słavakii.
Ukraina płanuje ŭ 2013 hodzie ŭkłaści kantrakt na pastaŭku pryrodnaha hazu ŭ abjomie 7 młrd kub. m. u hod praz terytoryju Vienhryi i Słavakii. Z 1 sakavika 2012 «Ukrtranshaz» zabiaśpiečyŭ mahčymaść pryjomu hazu ź Vienhryi va Ukrainu ŭ abjomie da 3 młn kub. m. u dzień u zimovy pieryjad i bolš za 1 młn kub. m. - u letni. Pytańnie pastaŭki hazu z terytoryi Słavakii ŭ abjomie da 3 młn kub. m u dzień na hety momant patrabuje technałahičnaha ŭzhadnieńnia.
Napačatku lutaha 2013 ministr enerhietyki i vuhalnaj pramysłovaści Ukrainy Eduard Stavicki zajaviŭ, što Ukraina płanuje ŭ pieršym kvartale hetaha hoda pačać pastaŭki hazu ź Jeŭropy praz Słavakiju i Vienhryju.
Nahadajem, što zhodna z pahadnieńniem, maksimalny abjom hazu, jaki moža być pastaŭleny va Ukrainu niamieckim hazavym trejdaram RWE Supply & Trading, składaje 10 młrd kub. m. RWE Supply & Trading pradaŭ Nacyjanalnaj akcyjaniernaj kampanii «Naftahaz Ukrainy» pavodle vynikaŭ 2012 hoda, pieršaha hoda, u jakim kraina pačała impartavać hety vid paliva ź jeŭrapiejskaha rynku, 56 młn kub. m hazu.