Ułaśnikaŭ, jakija zapazyčylisia pa kamunalnych płaciažach, zmohuć vysialać z kvater z 2 sakavika 2013 hoda.
Z ustupleńniem u siłu novaha Žyllovaha kodeksa (ŽK), da ŭładalnikaŭ kvater, jakija majuć zapazyčanaść za žyllova-kamunalnyja pasłuhi (ŽKP), buduć prymianiać bolš žorstkija miery ŭździejańnia.
Jak rastłumačyli karespandentu ahienctva «Minsk-Naviny» u HA «Mienskaja haradskaja žyllovaja haspadarka» (MHŽCH), zhodna z art. 155 novaha kodeksa kvatera złosnaha niepłacielščyka ź liku ŭłaśnikaŭ moža być pa rašeńni suda vystaŭlenaja na publičnyja tarhi. Z atrymanaj ad prodažu sumy adnimuć sumu zapazyčanaści za žyllova-kamunalnyja pasłuhi, a za tyja hrošy, što zastalisia, miascovy vykanaŭčy i rasparadčy orhan nabudzie i pieradaść byłomu ŭładalniku va ŭłasnaść inšaje žyllo. Jano budzie mienšaj płoščy, moža sastupać papiaredniamu pa svaich spažyvieckich jakaściach i pry hetym raźmiaščacca nie ŭ Miensku, a ŭ inšym nasielenym punkcie.
Pry hetym daŭžniku, jaki maje 6-miesiačnuju zapazyčanaść, budzie pradastaŭlenaja mahčymaść na praciahu hoda samastojna raspłacicca pa pazykach abo pradać žyllo.
Takaja ž norma budzie prymianiacca da tych uładalnikaŭ, jakija na praciahu hoda try i bolš razoŭ pryciahvalisia da administracyjnaj adkaznaści za parušeńnie praviłaŭ karystańnia žyłymi i dapamožnymi pamiaškańniami i ich utrymańnia.
— Užyvańnie dadzienaj normy budzie nasić chutčej papieradžalny charaktar i nahadvać ułaśnikam pra nieabchodnaść zachavańnia patrabavańniaŭ žyllovaha zakanadaŭstva, — adznačyła načalnik adździeła arhanizacyjna-kadravaj i pravavoj raboty MHŽCH Maryna Śmirnova.
Usio ž u MHŽCH nie vyklučajuć, što vypadki prodažu pryvatyzavanaha žylla za pazyki buduć.
Pa stanie na 1 lutaha biahučaha hoda 14.663 ułaśnika kvater mieli zapazyčanaść pa kamunalnych płaciažach na sumu 3 młrd. 885 młn. rubloŭ (taksama 6.032 najmalnika — na sumu 2 młrd. 106 młn. rubloŭ). Ź ich 377 uładalnikaŭ uchilalisia ad apłaty bolš za 6 miesiacaŭ, ich ahulnaja pazyka składała 519 młn. rubloŭ (siarod najmalnikaŭ takaja zapazyčanaść ličyłasia pavodle 305 asabovych rachunkaŭ na sumu 736 młn. rubloŭ).
ŽREA rajonaŭ užo raspačali pieršyja kroki pavodle novaha ŽK: za luty nakiravali ŭłaśnikam-niepłacielščykam bolš za 600 apaviaščeńniaŭ pra nieabchodnaść pahasić zapazyčanaść pa kamunalnych płaciažach. Reakcyja rušyła ŭśled: na siońniašni dzień 20% złosnych daŭžnikoŭ raspłacilisia z abaviazkami całkam, 5% — častkova.
Pa-raniejšamu Žyllovamu kodeksu tolki najmalnikaŭ, jakija pražyvajuć u dziaržaŭnych kvaterach, u sudovym paradku pierasialali ŭ žyllo mienšaj płoščy za doŭhaterminovuju zapazyčanaść pa apłacie ŽKP abo vysialali biez pradastaŭleńnia žyłpłoščy za nieadnarazovyja parušeńni praviłaŭ karystańnia žyłym pamiaškańniem. Takija miery ŭ adnosinach da ich prapisanyja i ŭ novym ŽK.
Minsk-Naviny
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH