Adnym ź pieršych «lišnich» padarunkaŭ staŭ ajfon.
«Lišni» BMW u padarunak.
Na abviestku pra «lišni» fotaaparat Canon 5d Mark 2 klunuli mnohija biełarusy.
A potym na žart pačali składać parodyi. «Niepatrebnaja» elektryčka.
«Lišni» kinapryz.
Karystalniki sacyjalnych sietak prydumali novuju zabaŭku. Schiema prostaja: čałaviek piša, što atrymaŭ u padarunak (jak varyjant — nabyŭ) novuju reč. U suviazi z hetym jon choča jaje padaryć vypadkovamu čałavieku. Ščaśliŭčykam stanie adzin z karystalnikaŭ sacsietak, jaki pierastavić hety dopis sabie.
Pryčynu ščodraści ŭładalnik «lišniaj» rečy tłumačyć tym, što jon «z pahardaj stavicca da sučasnaj kredytna-hrašovaj sistemy i naohuł nie lubić naš pamiašany na hrošach śviet». Žartaŭniki nie abciažarvajuć siabie lišnim kłopatam, kab źmianić pryčyny svajoj fienamienalnaj ščodraści i choć niejak padkarektavać tekst.
Tym nie mienš, novaja schiema pracuje. I pryčyna tut, peŭna, najpierš u «lišnich» padarunkach: heta i fotaaparat Canon 5d Mark 2, jaki prapanuje karystalnik ź Izraila i jaki ŭžo «łajknuŭ» nie adzin biełarus, i iPad, i navat «lišni» BMW.
Vielmi chutka novy žart staŭ abjektam daścipnych parodyj. Chtości sa słovami «niadaŭna ŭ nas skrali elektryčku, a načalnik depo pryhnaŭ novuju» prapanavaŭ «lišni» elektraciahnik, inšy žartaŭnik trapiŭ u situacyju, kali «lišniaj» apynułasia para škarpetak. Ščaślivych uładalnikaŭ taksama čakaje «niepatrebnaja ŭžo» nyrka, a taksama adna ź dźviuch statuetak «Oskara» — nu i praŭda, navošta ich dźvie ŭ adnoj haspadarcy?
Što chavajecca za novym virusnym žartam? Vyhladaje, što heta najchutčej sposab padvysić papularnaść svajoj staronki. Mahčyma, zarabić troški na rekłamie. Na machlarstva heta mała padobna, bo žartaŭniki nie prosiać za «lišni» kavałak čelabinskaha mietearyta ni kapiejki.
