Novaje abvinavačvańnie pryniasie i źmienu miery strymańnia? Pakul Dorna pryvoziać u aŭtazaku.
U sudzie Centralnaha rajona stalicy praciahvajecca praces nad kiraŭnikom Iudziejskaha relihijnaha abjadnańnia Juryjem Dornam.
28 lutaha prakuror začytała novaje abvinavačvańnie. Zhodna ź im,
Dornu inkryminujucca dziasiatki epizodaŭ, ale tolki pa adnym kryminalnym artykule — pieravyšeńnie ŭłady albo słužbovych paŭnamoctvaŭ (1-426 KK).
Pieršapačatkova było piać arytkułaŭ. Heta i atrymańnie chabaru, i niaspłata padatkaŭ, i słužbovy padłoh.
Kali raniejšaje abvinavačvańnie zhodna z Kryminalnym kodeksam ciahnuła na 15 hadoŭ turmy, to ciapier tolki na try. Albo navat štraf.
Pa viersii prakurora, Dorn ciaham 2009-2012 hadoŭ niezakonna zaklučaŭ i skasoŭvaŭ damovy na zdaču ŭ arendu pamiaškańniaŭ, što naležać Iudziejskamu relihijnamu abjadnańniu.
«Naŭmysna, vidavočna vychodziačy za pravy i paŭnamoctvy, jakija dadzienyja jamu pa słužbie», «niezakonna, biez rašeńnia praŭleńnia» — paŭhadziny źlatała z vusnaŭ prakurora.Mienavita stolki jana začytvała abvinavačvańnie. Pieršapačatkova na heta spatrebiłasia kala troch hadzin.
Jana taksama nazvału sumu 15 tysiač dalaraŭ, jakija Dorn nibyta atrymaŭ pry zaklučeńni apošniaj damovy ŭ vyhladzie arendnaj apłaty. Ale ni słova pra chabar.
Kamientavać novaje abvinavačvańnie prakuror admoviłasia: nie daje kamientaroŭ dla presy.
U pracesie pierapynak da 6 sakavika. Za hety čas advakaty pavinny aznajomicca z novym abvinavačvańniem i vybudavać liniju abarony.
Juryj Dorn pa-raniejšamu ŭ jarmołcy na hałavie. Jon uśmichajecca, chacia za kratami znachodzicca amal hod.
Jaho zatrymali 13 sakavika 2012, jak paśla paviedamlali śledčyja, pry atrymańni chabaru ŭ 13 tysiač dalaraŭ. A adzin z epizodaŭ abvinavačvańnia tyčyŭsia vyvazu z Voranaŭskaha rajona ŭ ZŠA doma, dzie niekali žyŭ duchoŭny lidar jaŭrejskaj hramady Chafiec-Chaim.
Dorna abaraniajuć dva advakaty. Adzin ź ich — Alaksiej Jarmošyn, syn kiraŭnicy Centrvybarkama Biełarusi Lidzii Jarmošynaj.