Maci abvinavačanaha ŭ zdradzie dziaržavie Andreja Hajdukova Volha paviedamiła, što suviaź z synam jana moža padtrymlivać tolki praź listy.
«Historyja vakoł syna praciahvaje zastavacca dla nas dziŭnaj i niezrazumiełaj. Spatkańnie ź im mnie nie dazvolili, telefanavańniaŭ ad jaho nie było.Jość tolki mahčymaść pisać listy», — skazała Volha Hajdukova 7 lutaha na pasiadžeńni kruhłaha stała ŭ Minsku.
Dvaccacitrochhadovy namieśnik staršyni Sajuza maładych intelektuałaŭ Andrej Hajdukoŭ byŭ zatrymany supracoŭnikami KDB u Viciebsku 8 listapada «ŭ momant zakładki tajnika sa źviestkami, jakija cikavyja zamiežnym śpiecsłužbam». Na padstavie artykuła 356 Kryminalnaha kodeksa (zdrada dziaržavie ŭ formie praviadzieńnia ahienturnaj dziejnaści) jamu pahražaje ad 7 da 15 hadoŭ pazbaŭleńnia voli.
11 listapada Hajdukoŭ byŭ pieraviedzieny ź Viciebska ŭ SIZA KDB u Minsku, 29 listapada — nazad u abłasny centr, a 22 śniežnia — znoŭ u stalicu. Pavodle słovaŭ svajakoŭ, spačatku jaho ŭtrymlivali ŭ SIZA na vulicy Vaładarskaha, a 27 śniežnia dastavili ŭ śledčy izalatar KDB.
«My tak i nie možam zrazumieć, što nasamreč adbyvajecca vakoł syna. Tak, my viedali, što ŭ jaho apazicyjnyja pohlady, što jaho dziejnaść nie padabałasia ŭładam. Ale pryčym tut suviaź z CRU?Andrej sam zaŭsiody kazaŭ, što ničoha supraćzakonnaha nie robić. Dla jaho raźvićcio padziej było jak śnieh na hałavu. Heta bačna ź jaho listoŭ», — paviedamiła Volha Hajdukova.
Jana taksama zaznačyła, što ŭ svaich listach jaje syn prosić nie pieražyvać za jaho.
Lidar niezarehistravanaha abjadnańnia «Sajuz maładych intelektuałaŭ» Jaŭhien Kanstancinaŭ paviedamiŭ, što niezadavolenaść uładaŭ mahła vyklikać dziejnaść Hajdukova pa padrychtoŭcy dakumientaŭ da aficyjnaj rehistracyi arhanizacyi. «My bačyli „Sajuz maładych intelektuałaŭ“ u jakaści mižnarodnaj arhanizacyi. Andrej niepasredna zajmaŭsia pytańniami, źviazanymi z rehistracyjaj. Kali b jaho nie aryštavali, praz dva tydni my b užo zmahli padać dakumienty na rehistracyju», — skazaŭ jon.
Kaardynatar hramadzianskaj inicyjatyvy «Za volu» Hanna Šapućka ličyć abvinavačańnie Hajdukova absurdnym. «Spačatku ja zadumvałasia, moža, ułady pakažuć dakumienty, što ŭ nas u krainie sapraŭdy dziejničajuć niejkija špijony. Ale prajšli ŭžo try miesiacy z momantu aryštu, usio, što adbyvajecca, stała padobnym na fars, na čarhovyja dziejańni ŭładaŭ suprać hramadskich i apazicyjnych aktyvistaŭ. Andreja Hajdukova možna ličyć palitźniavolenym», — skazała jana.
