Prablemu Kurapataŭ abmierkavali ź ministram kultury 4

U sustrečy taksama ŭdzielničali kaardynatar hramadskaj inicyjatyvy «Za ŭratavańnie miemaryjału «Kurapaty» Hanna Šapućka, a taksama siabra inicyjatyvy i mižnarodnaha historyka-aśvietnaha, dobračynnaha i pravaabarončaha tavarystva «Miemaryjał» Uładzimir Ramanoŭski.

Pradstaŭniki hramadskaści padkreślili, što ličać niesumiaščalnym znachodžańnie pobač takich roznych pa svajmu pryznačeńniu abjektaŭ, jak restaranna-zabaŭlalny kompleks «Bulbaš-choł» i Kurapaty,

a taksama zajavili, što lubyja prajekty miemaryjalizacyi Kurapataŭ i zabudovy prylehłaj da ŭročyšča terytoryi pavinny ŭzhadniacca z hramadskaściu.

Pad čas sustrečy ŭźnimałasia pytańnie pra toje, što siabry inicyjatyvy nie vałodajuć poŭnaj infarmacyjaj pra raspracoŭku prajektu detalovaha płanu terytoryi, jakaja adnosicca da Kurapataŭ, u tym liku nakont aktualnych, pa vyznačeńniu čynoŭnikaŭ, miežaŭ pomnika i jahonych zonaŭ — achoŭnaj i rehulujemaj zabudovy.

Prahučali prapanovy hramadskaści ŭklučyć u pracoŭnuju hrupu pa padrychtoŭcy prajektu pradstaŭnikoŭ inicyjatyvy, albo ŭličyć jaje pazicyju ab zachavańni dziejučych miežaŭ achoŭnych zonaŭ u Kurapatach zhodna adpaviednaj schiemy, zaćvierdžanaj pastanovaj Ministerstva kultury ad 12 maja 2004 hodu;

spryjać arhanizacyi hramadskaha abmierkavańnia raspracavanaha prajektu z uviadzieńniem u skład admysłovaj kamisii pradstaŭnikoŭ inicyjatyvy ź ich svoječasovym infarmavańniem pra rehłamient praviadzieńnia hramadskaha abmierkavańnia, a taksama padtrymać pazicyju inicyjatyvy ab nieabchodnaści pieranosu «Bulbaš-chołu» ŭ inšaje miesca.

Načalnik upraŭleńnia pa achovie historyka-kulturnaj spadčyny i restaŭracyi Ministerstva kultury Ihar Čarniaŭski paviedamiŭ, što Minski rajvykankam daručyŭ raspracoŭku prajektu detalovaha płanu terytoryi vakoł Kurapataŭ zabudoŭščyku «Bulbaš-chołu» STAA «BiełRest Inviest», «katory pa hetamu pytańniu da nas pakul nie źviartaŭsia». «Ale ja papiaredziŭ raspracoŭščykaŭ prajektu, što jon pavinien być zaćvierdžany Biełaruskaj respublikanskaj navukova-mietadyčnaj radaj pa pytańniach historyka-kulturnaj spadčyny pry Ministerstvie kultury», — skazaŭ Čarniaŭski.

Ministr Śviatłoŭ daručyŭ nakiravać u Minski abłvykankam list pra abaviazkovuju ekśpiertyzu prajektu ŭ Ministerstvie kultury.

Pad čas sustrečy ŭźnimalisia i inšyja pytańni: da hetaj pary nie vykananany ni adno pałažeńnie pastanovy Savieta ministraŭ BSSR ad 18 studzienia 1989 hoda pa ŭviekaviečvańniu pamiaci achviaraŭ masavych represij 1937–1941 hadoŭ u Kurapatach (havorka idzie pra praviadzieńnie adkrytaha konkursu na prajekt pomnika, jaho ŭstalavańnie i dobraŭparadkavańnie lasnoha masivu, pra ŭsiebakovaje vyvučeńnie pryčyn i nastupstvaŭ masavych represij, a taksama pra padrychtoŭku śpiecyjalnaha encykłapiedyčnaha vydańnia z metaj uviekaviečvańnia pamiaci achviaraŭ represij); narodny miemaryjał patrabuje bolš pilnaj uvahi z boku hramadstva i dziaržavy, bo na terytoryi ŭročyšča adbylisia šmatlikija akty vandalizmu, a taksama pra nieabchodnaść papularyzacyi ŭ hramadstvie temy masavych represij pieryjadu stalinizmu.

Ministr daručyŭ padrychtavać list da Minskaha rajonnaha ŭpraŭleńnia ŭnutranych spraŭ z prapanovaj, kab Kurapaty byli ŭklučany ŭ maršrut patrulna-pastavoj słužby.

***

Na 13 lutaha pryznačana sustreča pradstaŭnikoŭ hramadskaj inicyjatyvy «Za ŭratavańnie miemaryjału «Kurapaty» z namieśnikam staršyni Minskaha abłvykankama Alaksandram Juškievičam pa situacyi z budaŭnictvam kala ŭročyšča restaranna-zabaŭlalnaha kompleksu «Bulbaš-choł».

Marat Haravy, Novy čas

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH